खाद्यान्न आपूर्ति सहज बनाउन उद्योगमन्त्रीको निर्देशन
उद्योग, वाणिज्य तथा आपूर्तिमन्त्री दामोदर भण्डारीले चाडपर्वमा दैनिक उपभोग्य वस्तुको आपूर्ति सहज बनाउन साल्ट ट्रेडिङ कर्पोरेसनलाई निर्देशन दिनुभएको छ ।
चाडबाडमा उपभोग्य वस्तुको कृत्रिम अभाव तथा अस्वभाविक मूल्यवृद्धि हुन नदिन कर्पोरेसनले बजारमा गतिलो हस्तक्षेप गर्नुपर्नेमा उहाँले जोड दिनुभयो । कर्पोरेसनको ६२ औं वार्षिकोत्सवलाई आज सम्बोधन गर्दै मन्त्री भण्डारीले भन्नुभयो, ‘अब दैनिक उपभोग्य वस्तुको अभाव हुदैँन, साल्ट ट्रेडिङ हाम्रो साथमा छ भनेर आम जनतालाई विश्वास दिलाउनुपर्छ ।’
सेवा प्रवाह, बजारीकरण, दायरा र व्यापार वृद्धि गर्न प्रविधिको प्रयोगलाई बढावा दिनुपर्ने सुझाव दिँदै उहाँले रासायनिक मलको सहज आपूर्तिमा पनि नेतृत्वदायी भूमिका निर्वाह गर्नुपर्ने बताउनुभएको छ ।
‘साल्ट ट्रेडिङ यस्तो ब्राण्ड बनोस् कि नामै काफी होस्, यसको उत्पादन आफ्नै ब्राण्ड बनोस्,’ मन्त्री भण्डारीले भन्नुभयो । उहाँले संस्थाको व्यवसाय विस्तारका लागि योजना बनाउन व्यवस्थापन र कर्मचारीलाई पनि निर्देशन दिनुभयो ।
उद्योगमन्त्री भण्डारीले अत्यावश्यक वस्तुको अभाव हुन नदिनतर्फ सदैव सचेत हुनुपर्ने उल्लेख गर्दै भन्नुभयो, ‘कर्पोरेसनले भरपर्दो आपूर्ति श्रृङ्खला बजारमा गतिलो हस्तक्षेप बजार मूल्यमा समायोजन र गुणस्तरीय वस्तुको सहज उपलब्धतामा ध्यान दिनुपर्छ ।’
कर्पोरेसनका अध्यक्ष प्रदीपलाल श्रेष्ठले गुणस्तरीय दैनिक उपभोग्य वस्तु सर्वसुलभ मूल्यमा जनताको घरदैलोमा पुर्याउन क्रियाशील रहेको बताउनुभयो । उहाँले आगामी दिनमा संस्थाको सेवा र व्यवसाय थप विस्तार गर्ने प्रतिबद्धता पनि व्यक्त गर्नुभयो ।
प्रमुख कार्यकारी अधिकृत उर्मिला श्रेष्ठले चाडपर्वमा दैनिक उपभोग्य वस्तु नुन, चिनी, तेल, चामल, पिठो, दाल, गेडागुडी, ग्याँसलगायत अत्यावश्यक वस्तुको सहज आपूर्तिको व्यवस्था मिलाइएको जानकारी गराउनुभयो ।
यो वर्ष कर्पोरेसनले वार्षिकोत्सवमा माध्यमिक शिक्षा परिषद् (एसईई) मा उत्कृष्ट अंक ल्याउने कर्मचारीका दुई सन्ततिलाई छात्रवृत्ति प्रदान गरेको छ । यस्तै, एक लाख रुपैयाँ राशीको ‘लक्ष्मीदास मानन्धर बाल हितकारी पुरस्कार’ बाट मानव कल्याण समाज काभ्रेपलाञ्चोकलाई पुरस्कृत गरिएको छ ।
वार्षिकोत्सवमा कर्पोरेसनका विभिन्न कार्यालयमा उत्कृष्ट कार्य गर्ने कर्मचारीलाई पुरस्कृत गर्नुका साथै २० वर्ष सेवा अवधि पुरा गरेका कर्मचारीलाई कदरपत्र प्रदान गरिएको जनाइएको छ ।
टिप्पणीहरू