प्रधानमन्त्रीको अमेरिका भ्रमणमा चार छुट्टाछुट्टै सम्बोधन

प्रधानमन्त्री केपी शर्मा ओली संयुक्त राष्ट्रसंघको ७९ औं महासभामा भाग लिन नेपाली प्रतिनिधिमण्डलको नेतृत्व गर्दै पर्सि शुक्रबार अमेरिका जान लाग्नुभएको छ । मंगलबारदेखि न्यूयोर्कस्थित राष्ट्रसंघको मुख्यालयमा शुरु हुने महासभामा भाग लिन उहाँ त्यता जान लाग्नुभएको परराष्ट्र मन्त्रालयले जनाएको छ । 

कार्यक्रमअनुसार भोलिपल्ट अमेरिकी राष्ट्रपति जो बाइडेनले आयोजना गर्ने रात्रिभोजमा सहभागी हुने र असोज १० गते प्रधानमन्त्री ओलीले राष्ट्रसंघको महासभालाई सम्बोधन गर्नुहुने छ ।

त्यस्तै राष्ट्रसंघको समिट अफ द फ्युचर कार्यक्रमलाई सम्बोधन, कोलम्बिया युनिभर्सिटी र हाभर्ड विश्वविद्यालयमा मन्तव्य दिने कार्यक्रम छ । उहाँले राष्ट्रसंघका महासचिव एन्टोनियो गुटेरेससँग पनि भेट गर्ने बताइएको छ ।

प्रधानमन्त्रीको भ्रमण टोलीमा पत्नी राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका प्रमुख सल्लाहकार विष्णु रिमाल, परराष्ट्रसचिव सेवा लम्साललगायत २२ जना रहने बुझिएको छ ।

प्रधानमन्त्री आगामी १४ गते स्वदेश फर्कनुहुने छ ।