प्रधानमन्त्रीको अध्यक्षतामा बसेको एमाले बैठकले गर्यो सरकारलाई यस्तो आग्रह

सत्तारुढ दल नेकपा एमालेले प्राकृतिक विपद्बाट घरवास गुमाएका १० हजार परिवारलाई छिटो पुनर्वासको व्यवस्था मिलाउन सरकारसँग आग्रह गरेको छ ।

प्रधानमन्त्रीसमेत रहेका अध्यक्ष केपी शर्मा ओलीको अध्यक्षतामा आज बसेको सचिवालय बैठकले सरकारलाई घच्घच्याउने निर्णय गरेको हो । विपद्बाट प्रभावित परिवारलाई छिटो भन्दा छिटो घर बनाउने व्यवस्था मिलाउन ओलीसहित बसेको बैठकले सरकारको ध्यानाकर्षण गराएको छ । 

पुनर्वासका लागि सचेत गराएको एमालेले विपत् प्रभावितको उद्धारमा भने सरकारको भूमिकाप्रति सन्तुष्टि जनाएको छ । उपमहासचिव प्रदीप ज्ञवालीले सरकारको क्षमताअनुसार खोज तथा उद्धार कार्य भएको दाबी गरे । 

प्राकृतिक प्रकोप र सरकारको क्षमताबीचको ग्यापले केही असहज परिस्थिति सिर्जना भएको स्वीकार गर्दै उनले त्यसमा आमनागरिक पनि दोषी रहेको बताए  । 

‘सरकारले आफ्नो सामर्थ्यले भ्याएसम्म गरेको छ । प्राकृतिक प्रकोप र सरकारको भोलुमको बीचमा ग्याप त हुँदो नै रहेछ । नेपाली सेना, नेपाल प्रहरी, सशस्त्र प्रहरी बल, कर्मचारीहरु सबै खट्नुभएको छ । तर, मौसम विज्ञहरुले मुसलधारे वर्षा हुने अनुमान गर्नुभएको थियो । त्यसलाई मध्यनजर गरेर सरकारले सतर्क रहन सूचना दिएको हो । कति कुरामा नागरिकहरुको सजगतामा कमी पनि भयो ।'