रविलाई अदालत लगियो, रास्वपाका नेता काठमाडौँ फर्कंदै

सभापति रिहाइको माग गर्दै प्रदर्शनमा उत्रिएका राष्ट्रिय स्वतन्त्र पार्टी (रास्वपा) का नेता तथा कार्यकर्ताले काठमाडौँ फर्किने तयारी थालेका छन् । पोखराका स्थानीयको सोचेजस्तो साथ नपाएको र प्रदर्शनप्रति जनआक्रोश बढ्दै जान थालेपछि उनीहरु फर्किन लागेका हुन् । 

गत शुक्रबार लामिछाने पक्राउ परेपछि शनिबारदेखि रास्वपाले निरन्तर प्रदर्शन गरिरहेको छ । देशभरबाट कार्यकर्ता तथा समर्थक पोखरा उतार्ने भनिए पनि प्रदर्शन दिन प्रतिदिन कमजोर बन्दै गएको देखिन्छ । अर्कोतिर सहकारी पीडितको पक्षमा रहेका स्थानीयले रास्वपाका कार्यकर्ता घेर्न थालेका छन् । 

सबै हिसाबले अवस्था प्रतिकूल बनेपछि रास्वपाले आज अन्तिम प्रदर्शन गरेर काठमाडौँ फर्किने तयारी गरेको हो । उपसभापतिद्वय डिपी अर्याल र स्वर्णिम वाग्लेले आज पत्रकार सम्मेलन गरेर अब काठमाडौँ केन्द्रित आन्दोलन गर्ने जानकारी दिए । 

लामिछानेको बयान लम्बाएर हिरासतमै राखिराख्ने सरकारको नियत देखिएको भन्दै वाग्लेले आक्रोशसमेत पोखेका छन् । पक्राउ परेको १२५ घण्टामा लामिछानेसँग ४/५ घण्टामात्र बयान लिएको भन्दै उनले प्रश्न गरे, ‘के उहाँलाई यहाँ दालभात खुवाउन ल्याएको हो र ? तयारी थिएन पहिला ? के सोध्ने भन्ने थाहा छैन ?’

लामिछानेमाथि राजनीतिक प्रतिशोध साँधिएको घटनाक्रमले पुष्टि भएको अर्यालले दावी गरेका छन् । प्रशासनलाई प्रश्न गर्दै उनले भने, ‘मगाइएका कागज आइपुगेन भन्दै जबर्जस्ती अनुसन्धान लम्ब्याउने रणनीति भइरहेको छ ।’

त्यस्तै, सहप्रवक्ता मनिष झाले भने पोखराको प्रदर्शन सफल भएको दावी गरेका छन् । न्यायको लागि सरकारलाई झक्झक्याउन प्रदर्शन सफल भएको र अब काठमाडौँ केन्द्रित आन्दोलन गर्ने उनको भनाई छ । दिउँसो प्रदर्शन सकेर साँझ काठमाडौँ फर्किने उनको संकेत छ । 

रास्वपाका नेताहरुले पोखराको प्रदर्शन सफल भएको दावी गरिरहँदा स्थानीय भने असन्तुष्ट छन् । अस्ति रास्वपाका एक दर्जन नेताले घरदैलो गरेर प्रदर्शनमा सहभागी हुन आग्रह गरेपछि स्थानीयले विरोध जनाएका थिए ।  

उता लामिछानेलाई आज दोस्रो पटक म्याद थपका लागि कास्की जिल्ला अदालतमा उपस्थित गराइएको छ । रवि र छविलाल जोशीलाई सँगै अदालत लगिएको थियो । असोज ६ गते पक्राउ परेका जोशी र रवि  जिबी राई अध्यक्ष रहेको गोर्खा मिडिया नेटवर्क प्रालिको तत्कालीन सन्चालक र प्रवन्ध निर्देशक हुन् ।