सुप्रिम ठगीमा पनि तानिए रवि, बुटवल ल्याउन अदालतकाे आदेश

पोखराको सूर्यदर्शन सहकारीको रकम ठगीको अनुसन्धानमा हिरासतमा रहेका रवि लामिछाने बुटवलको सुप्रिम सहकारी ठगी प्रकरणमा पनि तानिएका छन् । हाल अनुसन्धानको क्रममा रहेका नेपाल प्रहरीका छविलाल जोशी बञ्जाडेसँग रुपन्देहीको सरकारी वकिल कार्यालयले दुई दिन बयान लिएपछि जिल्ला अदालतले रविलगायत अन्य एक दर्जनलाई पक्राउ गर्न अनुमति दिएको छ ।

न्यायाधीश श्यामप्रसाद श्रेष्ठको इजलासले आज उनीहरुलाई पक्राउ गर्ने अनुमति दिएको छ । उक्त सहकारीको रकम पनि रवि प्रबन्ध निर्देशक रहेको गोर्खा मिडिया नेटवर्कमा ल्याएर अपचलन गरिएको थियो । उक्त नेटवर्कका अध्यक्ष जिबी राई, उपाध्यक्ष जोशी थिए ।

जोशीलाई दुई दिन बयान लिएपछि पोखरा पठाइएको छ । रवि र छविलाई कास्की जिल्ला अदालतले आज पुनः एक साताको म्याद थप गरेको छ ।

बुटवलको सुप्रिम सहकारीबाट जोशीका नाममा २ करोड ५० लाख रुपैयाँ गएको देखिएको छ । त्यस्तै गोर्खा मिडिया नेटवर्कका तत्कालीन प्रबन्ध निर्देशक एवं रास्वपा सभापति रवि लामिछानेका नाममा २ करोड रकम गएको हालसम्मको अनुसन्धानमा देखिएको बताइन्छ ।

जोशी, लामिछानेसहित जीबी, भूपेन्द्रबाबु राई, कुमार रम्तेल र गोर्खा मिडिया नेटवर्कका नाममा सुप्रिमका १० हजार ३ सय ९१ बचतकर्ताको १४ करोड २९ लाख ३६ हजार रुपैयाँ रकम ट्रान्सफर गरिएको थियो ।

प्रहरीले यसअघि गरेको छानबिनमा जोशी, राई, सुप्रिमका अध्यक्ष ओमप्रकाश गुरुङसहित २८ जनाविरुद्ध जिल्ला अदालतमा मुद्दा दायर भइसकेको छ । तीमध्ये गुरुङ पुर्पक्षका लागि कारागार चलान भएका छन् । सहकारीका पूर्वसचिव दीपेश पुनसहित ६ जना धरौटीमा छुटेका हुन् । पूर्वअध्यक्ष राईसहित अन्य व्यक्ति फरार छन् ।

अदालतको पक्राउ अनुमतिसँगै रवि लामिछानेलाई रुपन्देही ल्याएर अनुसन्धान गर्ने मार्ग प्रशस्त भएको छ ।