'क्रान्ति' हटाएर पार्टी दर्ता गर्दै राजेन्द्र महतो

महन्थ ठाकुर नेतृत्वको लोसपा परित्याग गरी 'राष्ट्रिय मुक्ति क्रान्ति'को नाममा छुट्टै अभियान चलाइरहेका पूर्वमन्त्री राजेन्द्र महतोले दल दर्ता गर्न लागेका छन् । 

असोज १ गते पार्टी खोल्ने घोषणा गरेका उनले आज विधिवतरुपमा निर्वाचन आयोगमा दर्ता गराउन लागेका हुन् । पार्टीको नाम ‘राष्ट्रिय मुक्ति पार्टी नेपाल’ रहने बताइएको छ  । 

शुरुमा महतोले अभियानकै नामबाट 'राष्ट्रिय मुक्ति क्रान्ति नेपाल' राख्न खोजेका थिए । तर, आयोगले दलको नाममा ‘क्रान्ति’ शब्द राख्न नदिएपछि राष्टिय मुक्ति पार्टी मात्र रहने भएको हो । 

महतोको अध्यक्षतामा गठन हुने दलमा अहिले १८१ जना केन्द्रीय सदस्य रहने र विस्तारै आन्तरिक जिम्मेवार बाँडफाँड गरेर अन्य पदाधिकारी तोकिने बताइएको छ । 

उनले गत वर्ष फागुनमा लोसपा त्यागेर बहुल राष्ट्र निर्माणको लागि राष्ट्रिय मुक्ति क्रान्ति अभियान घोषणा गरेका थिए । त्यसअघि पनि उनी जनता समाजवादी पार्टीमा थिए ।