फिल्म चलेपछि कथा चोरेको आरोप

सिनेमा हलहरुमा आक्रमक व्यापार गरिरहेको चलचित्र ‘पूर्णबहादुरको सारङ्गी’माथि कथा चोरेको आरोप लागेको छ। डा. शिव शंकर बस्यालले फिल्मको मूल कथा आफ्नो सामाजिक उपन्यास ‘सङ्ग्रामपुर’सँग मिलेको दाबी गरेका हुन् । उनले ९ बुँदे आधार सार्वजनिक गर्दै नियोजित रुपमा कथा साभार गरिएको जिकिर गरेका छन् । 

ट्रेलर हेर्दा नै आफूलाई शंका लागेको र पूरै फिल्म हेरिसकेपछि उपन्यासको कथा र आशय हुबहु चोरिएको लेखकले बताएका छन् । उपन्यासका दुई मूल पात्र रुपमान र समिरको नाम परिवर्तन गरेर चलचित्रमा पूर्णबहादुर र कमल राखिएको उनको भनाई छ । 

‘पहिले ट्रेलरहरू आइपुग्दाखेरि कहीँ न कहीँ परिचित परिवेश जस्तै लागिरहेको थियो’, बस्यालले भनेका छन्, ‘यो संयोग होइन, यो नियोजित हो । एउटा क्रान्तिकारी उपन्यासलाई क्रान्तिविरोधी कार्यमा लगाउने प्रपञ्च । कुनै लोभ लालच प्रपञ्चले मैले यसो भनिरहेको छैन ।’

उपन्यास पढेका पाठकहरुले चलचित्र हेरिसकेपछि आफूलाई गुनासो गरेको र स्रस्टाको जन्मदाताको हैसियतले नैतिक दायित्व पूरा गर्न निमार्ण टिमसँग सकारात्मक जवाफको अपेक्षा गरेकाे पनि उनले बताएका छन् । 

चलचित्रले दर्शकहरुको मन जितिरहेकोमा खुशी व्यक्त गर्दै बस्यालले भनेका छन्, ‘दर्शकको मन जितिरहेको यो चलचित्रले अरु मान्छेहरुको मन जितिरहोस, मेरो यही शुभकामना ।' 

लक्ष्मीपूजाको अवसर पारेर प्रदर्शनमा आएको 'पूर्णबहादुरको सारंगी' ले चौतर्फी प्रशंसा पाइरहेको छ । एक हप्तामै ८ करोड कलेक्शन गरेको चलचित्रले शुरुमा मात्र ७० शो पाएको थियो । तर, बलियो ‘वर्ड अफ माउथ’को कारण हलहरुले शो बढाएर १९० पुर्याएका छन् । 

विदेशमा पनि चलचित्रले आक्रमक व्यापार गरिरहेको छ ।

डा. शिवशंकर बस्यालले फेसबुकमा लेखेका छन्-

पूर्णबहादुरको सारङ्गी र सङ्ग्रामपुर उपन्यास

बजारमा मन जितिरहेको पूर्णबहादुरको सारङ्गीले मेरो पनि मन तानिरहेको थियो। पहिले ट्रेलरहरू आइपुग्दाखेरि कहीँ न कहीँ परिचित परिवेशजस्तै लागिरहेको थियो। यसै बीचमा सारङ्गी उपन्यास पढेका एकजना भाइले चलचित्र हेरेपछि यसको कथा सङ्‌ग्रामपुर उपन्यासभित्र रहेको कथासँग मिलेको कुरा बताए। यसले मलाई केही कौतुहल बनायो। त्यसपछि म बिरामी अवस्थामै हल पुगेँ। पूर्ण बहादुरको सारङ्गीलाई एकपटक सङ्ग्रामपुर उपन्याससँग जुधाएँ। चलचित्रको मूल कथाको स्वरूपमा सारङ्गी उपन्यासका मूल मिलेका मूल प्रसंग मात्र यी पाएँ।

१. पूर्णबहादुर र कमल चलचित्रका दुई मात्र मूल पात्र हुन्। जसरी सङ्ग्रामपुर उपन्यासमा रूपमान र समीर!

२. पूर्णबहादुरको स्त्री विछोडको रहस्यमयी प्रसंग सारङ्गीमा रूपमानको स्त्री विछोडको प्रसंगजस्तै रहस्यमयी छ।

३. छोराको पालनपोषणमा दिलोज्यान मरिमेटी पूर्णबहादुरको शैली रूपमानसँग मिल्दा छन्। आमाको रहस्यमय कथा पूर्णबहादुरका अगाडि कमलले सोधेजस्तै पटकपटक रूपमानलाई समीरले निरन्तर सोधिरहने प्रसंग मिल्दो छ।

४. जसरी कमललाई विद्यालयका प्रधानाध्यापकले समाजको निम्न जात भनेर अपमान गरेर व्यंग्य गरेका छन, समीरलगायत रूपमानलाई विद्यालय व्यवस्थापन समितिका अध्यक्ष अर्थात् मुखिया र छोराले उस्तै शैलीमा अपमानित गरेका छन्।

५. पूर्णबहादुरको सारङ्गीको कमल पनि सङ्ग्रामपुर उपन्यासको समीरजस्तै टप विद्यार्थी हुनु।

६. त्यही टप भएको खबर सङ्ग्रामपुर उपन्यासको समीरकै शैलीमा दौडिँदै पूर्णबहादुरको सारङ्गीमा कमलले उही भावमा बाबुलाई खबर बताउनु।

७. सारङ्गी उपन्यासको समीरले जस्तै पूर्णबहादुरको सारङ्गीको कमल गन्धर्वले मेडिकलमा नाम निकाल्नु।

८. बालाई आर्थिक जोहो गर्न कठिन हुन्छ भनेर सङ्ग्रामपुर उपन्यासको समीरले मेडिकल पढ्न नखोजेजस्तै कमल गन्धर्वले पनि यही भावले मेडिकल पढ्न जान नखोज्नु।

९. रूपमानकै जोर जबरजस्तीले समीर मेडिकल पढ्न गएजस्तै पूर्णबहादुरकै जबरजस्तीले कमल मेडिकल पढ्न जानु।

यी यी त कथाका मूल प्रसंगहरू हुन्। यीबाहेक सूक्ष्म ढंगले सङ्ग्रामपुर उपन्यासको प्रभाव त्यहाँभित्र देख्न पाइन्छ। पूर्णबहादुरले नाचेको नाचको भाव,  छोराको परिचयबाट चिनिने प्रसंग, आफ्नो तिघ्रामा बल छ भन्ने दृश्यहरू पनि उपन्यासको छायाचित्रसँग मिल्छन्।

केही प्रसंगहरू बिलकुलविपरीत रूपमा प्रयोग गरिएका छन्। पूर्णबहादुरको सारङ्गीमा पूर्णबहादुर गन्धर्व छ, सङ्ग्रामपुर उपन्यासमा रूपमान भरिया। सङ्ग्रामपुर उपन्यासमा बाबुछोराको प्रेमसहित समीर सहरबाट फर्केपछि क्रान्तिकारी काममा लाग्छ। पूर्णबहादुरको सारङ्गीमा क्रान्तिका कुरा गर्छ तर क्रान्तिलाई नफरत गर्छ।

माथिका मूल बुँदाहरू नै पूर्णबहादुरको सारङ्गीको मूल कथा हो। मैले यसलाई साहित्यिक रूप मात्र प्रस्तुत गरेँ। यो भन्दा अरू कथामा नौलो भेटिनँ।

तसर्थ यो संयोग होइन, यो नियोजित हो। एउटा क्रान्तिकारी उपन्यासलाई क्रान्तिविरोधी कार्यमा लगाउने प्रपञ्च।

कुनै लोभलालच प्रपञ्चले मैले यसो भनिरहेको छैन। एउटा स्रष्टाको जन्मदाताको हैसियतले रूपरङ मिल्दा बोल्ने नैतिक दायित्व मेरो पनि हो! म अब नबोलौँ होला, तर इतिहासमा यो कोलाहाल रहिरहनेछ।

मन जितिरहेको यो चलचित्रले अरू मान्छेहरूको मन जितिरहोस्। मेरो यही शुभकामना!!!