कारोबारी समातेपछि भेटियो ठूलो परिमाणमा लागुऔषध

कपिलवस्तुमा ठूलो परिमाणको लागुऔषध फेला परेको छ । प्रहरीले लागुऔषधसहित कारोबारीलाई पक्राउ गरेको जनाएको छ । 

इलाका प्रहरी कार्यालय कृष्णनगरको विशेष सर्च अप्रेसनका क्रममा प्रतिबन्धित १३ हजार ट्रामाडोल क्याप्सुलसहित कारोबारी पक्राउ परेका हुन् । गएराति प्राप्त विशेष सूचनाको आधारमा कृष्णनगर प्रहरीले सर्च अप्रेसन चलाएको बताइन्छ ।

कृष्णनगर ३, हनुमान गढीबाट उक्त परिमाणको लागूऔषधसहित स्थानीय १९ वर्षे सिकन्दर चौहान पक्राउ परेका छन् । कृष्णनगरका प्रहरी निरीक्षक सुरज खत्रीका अनुसार पक्राउ परेका चौहानले दिएको जानकारीका आधारमा अन्य स्थानमासमेत लुकाइएको लागुऔषध बरामद गरिएको हो । 

कृष्णनगरमा यसअघि पनि ठूलो मात्रामा नेपालमा प्रतिबन्धित औषधिजन्य लागूऔषधसहित कारोबारीहरु पक्राउ परेको प्रहरीको दाबी छ ।