भारत पलायन अपदस्थ प्रधानमन्त्रीलाई कारबाही गर्न ढाकामा तयारी

बंगलादेशको अन्तरिम सरकार प्रमुख मोहम्मद युनुसले अपदस्थपछि भारत पलायन तत्कालीन प्रधानमन्त्री शेख हसिनालाई स्वदेश ल्याएर छानबिन तथा अनुसन्धान थालिने बताएका छन् । सरकार गठनको एक सय दिन पुगेको उपलक्ष्यमा राष्ट्रको नाममा सम्बोधन गर्दै युनुुसले हसिनालाई बंगलादेश पठाइदिन भारतसँग आफ्नो सरकारले अनुरोध गर्ने जनाए । 

गत जुलाई–अगस्तमा बंगलादेशमा भएको उग्र विद्यार्थी आन्दोलनपछि राजीनामा दिएर हसिना एकाएक भारत पलायन भएकी हुन् । त्यसपछि युनुसको नेतृत्वमा अन्तरिम सरकार गठन भएको हो । 

विद्यार्थी आन्दोलनमा सयौंको हताहतीप्रति हसिना र उनको सरकारलाई जिम्मेवार ठानिएको छ । उनीमाथि मानव अधिकार उल्लंघनको आरोपमा कारबाही गरिने दृढता अन्तरिम सरकार प्रमुख युनुसले व्यक्त गरेका छन् ।

हसिना र उनका सहयोगीहरूको गिरफ्तारीका लागि ‘रेड कर्नर’ नोटिस जारी गर्न बंगलादेशले अन्तर्राष्ट्रिय प्रहरी संगठन इन्टरपोलसँग माग गरिसकेको छ । हसिनाविरुद्ध अन्तर्राष्ट्रिय फौजदारी अदालतमा मुद्दा दायरको प्रक्रिया पनि अघि बढाइएको प्राप्त समाचारमा जनाइएको छ ।