‘आइडल दम्पत्ति'को तीन दशक लामो वैवाहिक सम्बन्ध अन्त्य

भारतका एक मात्र ओस्कार विजेता गायक तथा संगीतकार एआर रेहमानले सम्बन्ध विच्छेद गरेका छन् । बिहे गरेको २९ वर्षपछि उनले श्रीमती सायरा बानूसँग अलगिने निर्णय लिएका हुन् । 

सायराकी वकिल वन्दना शाहले एक वक्तव्य जारी गर्दै सम्बन्ध विच्छेदको पुष्टि गरेकी छन् । दुबैको निजि गोपनियता ख्याल गरिदिन आग्रह गर्दै उनले भनेकी छन्, ‘मिसेस सायरा र उहाँका श्रीमान एआर रेहमानले टाढा हुने कठोर निर्णय लिनुभएको छ । भावनात्मक तनावको कारण उहाँहरुले यो निर्णय लिनुभएको हो । एकअर्कासँग असीम प्रेम हुँदा हुँदै यो कठोर निर्णय लिएको देख्दा दर्शकलाई नराम्रो लाग्न सक्छ । तर दुवै जनाको प्राइभेसी ख्याल गर्दिएर नकारात्मक टिप्पणी नगरिदिनु होला ।’

लगत्तै गायक रहमानले पनि अब साम्हालिएर अघि बढ्नुको विकल्प नभएको बताएका छन् । उनले लेखेका छन्, ‘हरेक कुराको अन्दाज एकदिन समाप्त हुन्छ । टुटेको दिलको तौलले सायद भगवानको सिंहासन पनि हल्लिन्छ । तर सबका बाबजुद पनि सम्हालिएर अगाडि बढ्नु त छदैँ छ ।’

बलिउडमा ‘आइडल दम्पती’को रुपमा हेरिने रहमान र सायराले किन सम्बन्ध विच्छेद गरे ? कारण भने खुलेको छैन । 

५७ वर्षीय रहमान भारतमा लिजेण्ड म्युजिकसियनको रुपमा परिचित छन् । १७ सय करोडका मलिक उनले सम्बन्ध विच्छेद गर्दा श्रीमतीलाई कति दिए ? चासोको विषय बनेको छ । यस विषयमा केही खुलाइएको छैन । उनीहरूकाे तीन सन्तान छन् ।