उपचुनाव लड्ने ३७६ जनाको उम्मेदवारी फाइनल
मंसिर १६ गते हुने उपनिर्वाचनका लागि उम्मेदवारहरूको अन्तिम नामावली प्रकाशन गरिएको छ । निर्वाचन कार्यतालिका अनुसार निर्वाचन आयोगले आज साँझ उम्मेदवारको अन्तिम नामावली सार्वजनिक गरेको हो ।
जिल्ला समन्वय समिति, नगरपालिका प्रमुख तथा उपप्रमुख, गाउँपालिका अध्यक्ष तथा उपाध्यक्ष र वडा अध्यक्ष गरी ४४ रिक्त पदको लागि ४१० जनाले उम्मेद्वारी दिएका थिए । तर, ३१ जनाले उम्मेद्वारी फिर्ता गरेपछि आयोगले ३७६ जनाको अन्तिम नामावली प्रकाशन गरेको हो ।
यीमध्ये तीन जना निर्विरोध निर्वाचित भइसकेका छन् । जिल्ला समन्वय समिति ओखलढुंगा र कैलालीको प्रमुखमा क्रमश: टेकराज भट्टराई र टीकाकुमारी चौधरी निर्विरोध भएका हुन् । त्यस्तै, रुकुम पूर्वको पुथा उत्तरगंगा गाउँपालिका वडा नम्बर २ को वडाध्यक्षमा जगत घर्तीको मात्र उम्मेदवारी कायम भएपछि निर्विरोध भए ।
आयोगका अनुसार अब विभिन्न ४१ पदको लागि निर्वाचन हुनेछ । उपनिर्वाचनका लागि दर्ता भएका २५ राजनीतिक दलमध्ये ५ वटाले कुनै पनि स्थानमा उम्मेदवारी दिएका छैनन् ।
टिप्पणीहरू