मन्त्रीकै क्षेत्रमा नापीका कर्मचारी अवैध असुलीमा व्यस्त

भूमि व्यवस्था, सहकारी तथा गरिवी निवारणमन्त्रीकै क्षेत्रमा नापीका कर्मचारीहरुले अवैध असुली धन्दा चलाएपछि सर्वसाधारणले आपत्ति जनाएका छन् । कपिलवस्तुको निर्वाचन क्षेत्र नम्बर १ बाट निर्वाचित मन्त्री बलराम अधिकारीकै क्षेत्रको मायादेवी गाउँपालिकामा नापी कर्मचारीले अवैध रकम असुलेको स्थानीयको आरोप छ ।

नापी कार्यालय कपिलवस्तुले मायादेवी गाउँपालिकाको जग्गा व्यवस्थापन अन्तर्गत त्यहाँ रहेको गाउँ ब्लकको जग्गा नाप नक्सा गरेर पुर्जा बनाउन टोली खटाएको थियो । टोलीले अस्थायी कार्यालय मार्फत् काम गर्दै आएको छ । तर, खटिएका नापी कर्मचारीले सेवाग्राहीहरुसँग प्रतिकित्ता १ सय ५० रुपैयाँको दरले रकम असुल्दै आएको गुनासो गरेका छन् । स्थानीय सञ्चारकर्मीहरुले समेत सेवाग्राहीहरुसँग रकम असुलेको देखिएको बताएका छन् ।

टोली प्रमुख अमिन प्रदीप मण्डलको नेतृत्वमा रहेका कर्मचारीले बिनारसिद प्रतिकित्ता १५० रुपैयाँको दरले लिएको पीडित सेवाग्राहीहरुले बताए । मायादेवी २ का धर्मराज कलवारले कर्मचारीले हाकाहाकी रकम मागेको गुनासो पोखे । ‘मैले प्रति कित्ताको दरले रकम बुझाएँ तर रसिद पाइएन’ उनले भने, ‘हामीले भोट दिएर मन्त्री बनायौं, उहाँकै क्षेत्रमा कर्मचारीले घुस लिन्छन् हामी के बोल्ने ?’ कलवारले भने । 

मायादेवी २ का लालबहादुर यादवले पनि ४५० रुपैयाँ घुस दिएको बताए । ‘मेरो तीन कित्ता थियो, नदिएसम्म निवेदनमा तोक लगाएनन् । त्यसपछि  बाध्य भएर दिएँ,’ उनले भने । निवेदन तथा दर्तामा खटिएका नापी कर्मचारी रामकृष्ण यादव, मोतिलाल साह, नितेश मण्डल, रामनिवास केवट, सन्तोष थारुलगायत उक्त कार्यमा संलग्न रहेको बताइन्छ । 

कर्मचारीहरुले विभिन्न कारण देखाउँदै रकम लिन थालेपछि आफूले चासो राखेको गाउँपालिका अध्यक्षको भनाई छ । पालिका अध्यक्ष बलिउद्धिन मुसलमानले सेवाग्राहीलाई अनावश्यक दुःख नदिन र अवैध रकम लिएको पाइए कारबाही गर्ने धम्की दिएपछि उक्त कार्य रोकिएको बताइन्छ । 

यसबारे टोली प्रमुख मण्डलले निवेदन शुल्क लिएको हुनसक्ने बताए । ‘बाहिर निवेदन लेख्नेहरुले लिएको हुन सक्छ, कर्मचारीले लिएको छैन,’ दाबीका साथ उनले भने । आफ्नै जिल्लाका भूमिहीन गाउँब्लक पीडितसँग कर्मचारीले घुस लिएको गुनासो मन्त्रीको सचिवालयमा जानकारी गराए पनि कुनै कारवाही नभएको मायादेवी १ का वडाध्यक्ष इसहाक मुसलमानको दुःखेसो छ ।