चितवन राइनोज आक्रामक, पोखरा एभेञ्जर्स निरीह

नेपाल प्रिमियर लिग (एनपिएल) को आजको खेलमा चितवन राइनोजले शानदार जीत निकालेको छ । आजको दोस्रो खेलमा पोखरा एभेञ्जर्सलाई ८७ रनले पराजित गर्दै चितवन राइनोजले फराकिलो अन्तरले जीत हात पारेको छ ।

टस हारेर पहिले ब्याटिङमा उत्रिएको चितवनले राइनोजले सात विकेट गुमाउँदै १६२ रनको लक्ष्य दिएको थियो । तर पोखरा एभेञ्जर्स १३ ओभर एक बल खेल्दै ७४ रनमै सीमित भएको हो । चितवन राइनोजको बलिङमा पोखरा एभेञ्जर्सका खेलाडीहरु निरीहजस्तै देखिएका थिए । टिमको कप्तानी सम्हालेका कुशल भुर्तेलले कमजोर प्रदर्शन गर्दा अन्य खेलाडीहरुले पनि राम्रो पर्फमेन्स दिन सकेनन् । 

बरु चितवन राइनोजको तर्फबाट रवि बोपारले ३८ बलमा ५१ रन बनाउँदै उत्कृष्ट प्रदर्शन गरे । उनले तीन छक्का र तीन चौका प्रहार गरेका थिए । चितवन राइनोजले एनपिएलमा लगातार दोस्रो जीत निकालेको हो । यसअघि काठमाडौँ गुर्खाजलाई पराजित गरेको थियो । 

आजको पहिलो खेलमा सन्दीप लामिछानेको कप्तानी रहेको विराटनगर किंग्सलाई हराउँदै सुदूरपश्चिम रोयल्सले जीत निकालेको थियो ।