‘फ्रि भिसा फ्रि टिकट’ को प्रलोभन, विदेशमा बेचबिखन

‘फ्रि भिसा फ्रि टिकट’ मा कुवेतमा घरेलु काम लगाइदिने प्रलोभनमा मानव बेचबिखन गरेका दुई जना पक्राउ परेका छन् । सिन्धुपाल्चोकको जुगल गाउँपालिका–६, का २६ वर्षीय धर्म तामाङ र ३९ वर्षीय माईला लामा पाख्रिन भनिने टिकाराम तामाङलाई उक्त अभियोगमा प्रहरीले समातेको हो । 

कुवेतमा घरेलु काममा मासिक १२० कतारी रियाल कमाई हुने आश्वासन देखाएर उनीहरुले योजनाबद्ध रुपमा बेचबिखन गरेको प्रहरीको आरोप छ । उनीहरुले २०८० साउन ४ गते पीडितलाई त्रिभुवन अन्तर्राष्ट्रिय विमानस्थलबाट दुबई पुर्याएका थिए । 

त्यसको भोलिपल्ट कुवेतको अलजारा भन्ने ठाउँमा पुर्याएपछि घर मालिकलाई ९०० कतारी रियालमा बेचेको प्रहरीको ठहर छ । कुवेती घर मालिकले आफुमाथि चरम श्रम शोषणसँगै यौन शोषणसमेत गरेको पीडितले प्रहरीसमक्ष बताएकी छन् । 

पीडित महिला त्यहाँबाट फुत्केर कुवेत प्रहरीको शरणमा पुगिन् । यसपछि ट्राभल डकुमेन्ट बनाएर उनी गत कात्तिक ९ गते नेपाल फर्किएकी हुन् । प्रहरीको मानव बेचबिखन अनुसन्धान ब्युरोले सो कार्यमा संलग्न धर्मलाई लमजुङ र टिकारामलाई कास्कीबाट नियन्त्रणमा लिएको हो । 

उनीहरुमाथि मानव बेचबिखन तथा ओसारपसार मुद्दामा काठमाडौं जिल्ला अदालतबाट म्याद थप गरी अनुसन्धान भइरहेको जनाइएको छ ।