दिउँसो बयान सकिएका रविलाई भोलि बिहान पोखरा लगिँदै

सहकारी ठगीको आरोपमा प्रहरी नियन्त्रणमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेको पर्सामा बयान सकिएको छ ।  

हिजो साँझ पोखराबाट काठमाडौँ हुँदै वीरगञ्ज पुर्याइएका उनको आज जिल्ला सरकारी वकिल कार्यालय पर्सामा दिनभर बयान लिइएको थियो । बिहान १० बजे नै बयान लिन शुरु गरेकोमा दिउँसो साढे २ बजे सकिएको हो । 

सरकारी वकिलको रोहबरमा प्रहरीले लामिछानेलाई ५४ प्रश्न सोधेको थियो । बयान सकिएसँगै उनलाई आज जिल्ला प्रहरी कार्यालय पर्साको हिरासतमा पठाइएको र भोलि बिहान पोखरा फर्काइने जनाइएको छ । 

पोखराको सूर्यदर्शन सहकारी ठगीको आरोपमा कात्तिक २ गते पक्राउ परेका लामिछानेमाथि अन्य चार वटा सहकारीको रकम हिनामिना गरेको आरोप छ । सोहीक्रममा कास्की, रुपन्देही, काठमाडौँ र चितवनमा बयान दिइसकेका उनलाई वीरगंजस्थित सानोपाइला सहकारीको बचत घोटालाबारे अनुसन्धान गर्न त्यता लगिएको हो । 

यही प्रकरणमा नेपाल प्रहरीका पूर्वडीआईजी तथा गोर्खा मिडिया नेटवर्क प्रालिका पूर्वउपाध्यक्ष छविलाल जोशीको पनि प्रहरीले पाँचै जिल्लामा बयान लिएको छ । आधा दर्जन सहकारीको पैसा कुम्ल्याएर विदेश भागेका जिबी राई अध्यक्ष रहेको ती सहकारीबाट विभिन्न व्यक्तिका नाममा ऋण लिएर गोर्खा मिडियामा रकम प्रवाह गरेको प्रमाणका आधारमा लामिछाने र जोशीमाथि प्रहरीले अनुसन्धान गरेको हो । 

त्यसबखत गोर्खा मिडियाको प्रवन्ध निर्देशक र शेयर सदस्य रहेका लामिछानेविरुद्ध ठगी, संगठित अपराध र सम्पत्ति शुद्धीकरणसम्बन्धी कसुरमा अनुसन्धान चलिरहेको छ ।