रवि पत्नी निकिताको पनि सम्पत्ति जफत गर्न माग

सहकारी ठगी प्रकरणमा राष्ट्रिय स्वतन्त्र पार्टी (रास्वपा) का सभापति रवि लामिछानेकी पत्नी निकिता पौडेलविरुद्ध पनि मुद्दा चलाइएको छ । 

रविमार्फत भएको सहकारी घोटालामा उनलाई मुख्य कसुरदार नभई सम्पत्ति जफतका लागि जिल्ला सरकारी वकिल कार्यालय कास्कीले प्रतिवादी कायम गरेको हो । त्यस्तै,सम्पत्ति जफत प्रयोजनका लागि पद्मा बन्जाडे जोशी,रोचक चौधरी,राधा पछाई र गीता पछाईलाई पनि प्रतिवादी बनाइएको छ । 

अभियोग पत्रमा उनीहरुमाथि कानुन बमोजिम गर्न भनिएको छ ।

जिबी राई समूहले देशका विभिन्न स्थानमा सहकारी खोलेर गोर्खा मिडिया नेटवर्क प्रालिमा गैरकानुनी तवरले पुर्याएको झण्डै ७५ करोड रकम उक्त कम्पनीका प्रवन्ध निर्देशक रविले एकलौटी परिचालन गरेका थिए । त्यसमध्ये निकिताको खातामा ३५ लाख र उनका बाबु तथा रविका ससुरा गोपीकृष्ण मुभिजका मालिक उद्धव पौडेलको खातामा ५० लाख जम्मा गरेको अभियोग छ । 

उक्त रकम अहिले खातामा नरहेकाले क्रिप्टो र हुण्डीमार्फत विदेश ओसारिएको हुनसक्ने सरकारी पक्षको अनुमान छ ।

यसअघि अनुसन्धानका क्रममा लामिछाने दम्पत्तिको बैंक खातामा अस्वाभाविक कारोबार देखिएको थियो । रवि र निकिताको पाँच वटा फरक-फरक खातामा सन् २०१६ यता २१ करोड ट्रान्जेक्सन देखिएको प्रहरीले जनाएको छ ।

उक्त रकम अहिले खातामा नरहेकाले क्रिप्टो र हुण्डीमार्फत विदेश ओसारिएको हुनसक्ने सरकारी पक्षको अनुमान छ।  रवि र गोर्खा मिडियाका तत्कालीन उपाध्यक्ष छविलाल जोशीसहित ४४ जनाविरुद्ध आज जिल्ला अदालत कास्कीमा मुद्दा दर्ता भएको छ । उनीहरुलाई सहकारी ठगीसहित संगठित अपराध र सम्पत्ति शुद्धीकरणको कसुर लगाइएको छ ।