वकिलले बहस गर्दागर्दै रवि लामिछाने जुरुक्क उठेपछि...

इजलासमा बहस चलिरहेका बेला राष्ट्रिय स्वतन्त्र पार्टी (रास्वपा) का सभापति तथा पूर्वमन्त्री रवि लामिछाने जुरुक्क उठेर प्रतिवादमा उत्रिए- अब्जेक्सन श्रीमान् !, कास्कीका सहकारी पीडित जाहेरकर्ताको तर्फबाट बहस गरिरहेका वरिष्ठ अधिवक्ता रामचन्द्र गौतमले पत्नी निकिता र ससुरा उद्धव पौडेलको प्रसंग निकालेपछि आक्रोशित हुँदै उनले 'अब्जेक्सन' जनाएपछि केहीबेर बहस रोकियो । 

एकाएक माहोल तातेपछि न्यायाधीश नितिज राईले हस्तक्षेप गर्दै लामिछानेलाई सचेत गराए- बहस सुन्ने धैर्यता हुनुपर्छ, तपाईंले अब पनि वीचमा डिस्टर्ब गर्नुभयो भने मैले अर्को निर्णय पनि गर्नुपर्ने हुनसक्छ !' इजलासले बहसलाई निरन्तरता दिन भनेपछि अधिवक्ता गौतमले लामिछानेविरुद्धको अभियोग पुष्टि हुने आधार र कारणको लामो फेहरिस्त सुनाए । 

सूर्यदर्शन सहकारी संस्थाको रकम अपचलनसम्बन्धी मुद्दामा हिजो थुनछेक बहस चलिरहँदा इजलासमा यस्तो देखिएको हो । जिबी राई सन्चालक रहेको सूर्यदर्शन लगायत विभिन्न सहकारीबाट गोर्खा मिडिया नेटवर्क प्रालिमा गैरकानुनी तवरले पुर्याएको झण्डै ७५ करोड रकम उक्त कम्पनीको प्रवन्ध निर्देशकको हैसियतमा लामिछानेले एकलौटी परिचालन गरेका थिए । त्यसमध्ये निकिताको खातामा ३५ लाख र उनका बाबु तथा रविका ससुरा गोपीकृष्ण मुभिजका मालिक उद्धवको खातामा ५० लाख जम्मा गरेको अभियोग छ । अधिवक्ता गौतमले त्यसैमा केन्द्रित रहेर बहस गरेका थिए । 

बहस सुन्ने धैर्यता हुनुपर्छ, तपाईंले अब पनि वीचमा डिस्टर्ब गर्नुभयो भने मैले अर्को निर्णय पनि गर्नुपर्ने हुनसक्छ !

यो मुद्दामा लामिछानेसहित सात जना प्रतिवादीको बयान सकिएलगत्तै मंगलबारदेखि जिल्ला अदालतमा थुनछेक बहस जारी छ । बुधबार सरकारी वकिलले सकेसँगै हिजो जाहेरवालाका कानुन व्यवसायीले बहस गरेका थिए । शुरुमा बहस गरेका नायव महान्यायाधिवक्ता सन्जिव रेग्मीले लामिछानेलगायतका प्रतिवादीलाई थुनामा पठाउन माग गरे । 

त्यसपछि काठमाडौँबाट गएका वरिष्ठ अधिवक्ताद्वय डाक्टर सुरेन्द्र भण्डारी र दिनेश त्रिपाठी बहसमा उत्रिए । उनीहरुले पनि अभियोग पुष्टि हुने आधार प्रस्तुत गर्दै लामिछानेसहितलाई थुनामा पठाउनुको विकल्प नभएको जिकिर गरेका थिए । भण्डारीले त थुना बाहिर रहने सुविधा दिँदा उनी पुन: सत्तामा पुग्ने र शक्तिको आडमा मुद्दा प्रभावित पार्न सक्ने खतरातर्फ इजलासको ध्यानाकर्षण गराए । लामिछानेकै कारण राजनीतिक अस्थिरता निम्तिने उनको तर्क थियो । 

अदालत स्रोतका अनुसार बहसको अन्तिममा न्यायाधीश राईले लामिछानेलाई सोधे- तपाईंले अघि के भन्न खोज्नुभएको थियो,ल भन्नुस् । तर, पहिले आक्रामक देखिएका उनी इजलासले समय दिएपछि भने बोल्न चाहेनन् । उनले 'मेरो केही छैन' भनेपछि हिजोको अदालती कारवाही सकिएको थियो । 

आजदेखि प्रतिवादीका तर्फबाट बहस शुरु भएको छ । अहिले छविलाल जोशी बन्जाडेको तर्फबाट कानुन व्यवसायीहरु बहस गरिरहेका छन् । चिया ब्रेकअघि सर्वोच्चका पूर्व न्यायाधीश इश्वर खतिवडाका छोरा अधिवक्ता अपूर्व खतिवडाले बहस सिध्याए । छविलालको पहिला बयान भएकाले उनीबाटै बहस शुरु गरिएको बुझिएको छ । 

आज छविलालको बहस सकिने अवस्था नरहेकाले आइतबारमात्र लामिछानेको पालो आउने सम्भावना छ । उनको तर्फबाट आधा दर्जन बढीले बहस गर्ने तयारी छ । मंगलबारसम्म सबै प्रतिवादीको बहस सक्ने र बुधबार सरकारी वकिलले जवाफी बहस गरेपछि अर्को हप्ता आदेश आउनसक्ने अनुमान गरिएको छ ।