प्रधानमन्त्री सेल्फी खिच्न कस्सिएपछिको अर्थ बेग्लै

एमाले अध्यक्ष तथा प्रधानमन्त्री केपी शर्मा ओलीले ‘जे भन्नुहुन्छ, ठीक त्यसको उल्टो गर्नुहुन्छ’ भन्ने भाष्य नागरिकमा स्थापित हुँदै गएको छ । गत असार १७ गते बिहान तत्कालीन प्रधानमन्त्री पुष्पकमल दाहाल प्रचण्डसँग ‘सँगै स्वर्ग÷नर्क जाने’ कसम खाएर सोही मध्यराती नेपाली कांग्रेसका सभापति शेरबहादुर देउवासँग सात बुँदे सहमति गरेको घटना होस्, वा ‘भ्रष्टाचारीको मुख हेर्दिनँ’ भन्दै ठीक विपरितका घटनासँग जोडिएको विषय होओस् ।

प्रधानमन्त्री ओलीले विभिन्न यौन काण्डमा संलग्न आफ्ना नेताहरुलाई ‘मोजमस्ती गर्ने भए बाटो खुल्ला छ’ भन्दै पार्टीबाट किष्कासन गर्ने चेतावनी दिएको पनि धेरै भएको छैन । तर यतिबेला उहाँ आफै त्यस्ता नेतासँग नजिकिनुभएको पाइएको छ । जसलाई कारवाही गर्ने चेतावनी दिनुभएको थियो, उनीहरूलाई समीपमा राख्न थाल्नुभएको हो । 

पार्टी निकट अनेरास्ववियुले हिजो आयोजना गरेको एक कार्यक्रममा प्रधानमन्त्री ओली र ऐन महर निकै नजिक देखिनुभयो । महर उनै व्यक्ति हुन्, जसमाथि रश्मिला धामीले यौन शोषण र दुर्व्यवहारको आरोप लगाउँदै आएकी छन् । पार्टी कारवाहीमा परेर पुनः केन्द्रीय सदस्य मनोनीत भएका महरसँग पार्टीका अन्य नेताहरुले हाल दूरी कायम गरेको बताइन्छ । यस्तो अवस्थामा प्रधानमन्त्री ओली भने हिजोको कार्यक्रममा महरसँग गफिनुभएको हो । एक प्रत्यक्षदर्शीका अनुसार प्रधानमन्त्री ओलीले आफैं ‘खै मोबाइल ल्याउनुस् त’ भन्दै सेल्फीसमेत खिच्नुभएको थियो । 

यसअघि महर जस्तै पार्टीमा काण्डसँग जोडिएका महेश बस्नेत, गुलाबजंग शाह, सुरत शाही, सुनिता बराललगायतका नेताहरुसँग प्रधानमन्त्री ओली टाढै रहन खोजेको चर्चा चलेको थियो । तर हिजोको सामिप्यता र सेल्फीले भने प्रधानमन्त्री ओलीको मन पग्लेको हुनसक्ने पार्टीकै एक नेताको अनुमान छ । उनी भन्छन्, ‘पहिले उनीहरु (बस्नेत, बराल, महर, शाह)लाई ट्रयाकमा ल्याउने भन्नुहुन्थ्यो । अब उनीहरु ट्रयाकमा आएका हुन् कि अध्यक्षज्यू उनीहरूकै ट्रयाकमा जानुभएको हो, त्यो उहाँहरुलाई नै थाहा होला ।’