ट्रम्पको चिनियाँ राष्ट्रपतिसँग फोनवार्ता, ताइवान मामिलामा विवेक प्रयोग गर्न चीनको आग्रह

पर्सि राष्ट्रपति पदको शपथ लिनुअघि अमेरिकी नवनिर्वाचित राष्ट्रपति डोनल्ड ट्रम्प र चिनियाँ राष्ट्रपति सी चिनफिङबीच फोनवार्ता भएको छ । अमेरिकी भावी राष्ट्रपतिले शपथअघि चिनियाँ राष्ट्रपतिसँग गरेको कुराकानीलाई अन्तर्राष्ट्रिय राजनीतिक वृत्तमा अर्थपूर्ण ठानिएको छ ।

यता चिनियाँ विदेश मन्त्रालय र उता ट्रम्पले सामाजिक सञ्जाल ट्रुथ सोसलमा चिनियाँ राष्ट्रपतिसँग फोन वार्ता भएको बताएका छन् । दुई नेताबीच दुई मुलुकबीचको व्यापार, सामाजिक सञ्जाल टिकटकलगायत विषयमा कुराकानी भएको हो । 

राष्ट्रपति सीले ताइवान मामिला चीनको सार्वभौमसत्ता र क्षेत्रीय अखण्डतासँग जोडिएको स्पष्ट पार्दै अमेरिकी पक्षले यसमा विवेक लगाउनुपर्ने धारणा राख्नुभएको बताइएको छ । उता, ट्रम्पले टेलिफोन वार्तामा ताइवानबारे कुनै कुरा नभएको दाबी गरेका छन् ।

पर्सि हुने ट्रम्पको शपथ ग्रहण समारोहमा चीनले उपराष्ट्रपति हान झोङलाई पठाउने निर्णय गरेको छ ।