वकिललाई मुक्का हान्नेमा पाण्डे पनि संलग्न
वरिष्ठ अधिवक्ता दिनेश त्रिपाठीमाथि कुटपिट गरेको आरोपमा थप एक जना पक्राउ परेका छन् । हुम्लाको अदानचुली गाउँपालिका–४ घर भई काठमाडौं सूर्यदर्शन हाइट बस्ने ३२ वर्षीय महानन्द जैसी भनिने महेन्द्र पाण्डेलाई प्रहरीले नियन्त्रणमा लिएको छ ।
उनलाई टोखाबाट नियन्त्रणमा लिइएको जिल्ला प्रहरी परिसर काठमाडौंले जनाएको छ । उनीमाथि प्रहरी वृत्त सिंहदरबारले आवश्यक अनुसन्धान गरिरहेको छ । स्वर्णलक्ष्मी सहकारी ठगी मुद्दामा जाहेरकर्ताको तर्फबाट बहस सकेर बाहिर निस्किने क्रममा गत बुधबार त्रिपाठीमाथि काठमाडौं जिल्ला अदालत परिसरमा कुटपिट भएको थियो ।
राष्ट्रिय स्वतन्त्र पार्टी (रास्वपा) का सभापति रवि लामिछाने प्रतिवादी रहेको सहकारी ठगीको मुद्दामा पीडितको तर्फबाट वकालत गरैकै आधारमा आफूमाथि कुटपिट भएको त्रिपाठीको भनाइ छ । उनीमाथि कुटपिट गरेको आरोपमा प्रहरीले यसअघि दोलखाका ललित केसीलाई पक्राउ गरिसकेको छ । कुटपिटमा संलग्न अन्यको पनि खोजतलास भइरहेको प्रहरीले जनाएको छ ।
टिप्पणीहरू