सशस्त्र प्रहरीका कारण गृहमन्त्री दबाबमा

राजधानी बाहिर जानुभएका गृहमन्त्री रमेश लेखक आज बिहान ११ बजेसम्म जसरी पनि काठमाडौं आइपुग्नुपर्ने भएको छ । हिजो साँझ बिराटनगरबाट बुद्ध एअरको उडानमा राजधानी आउने कार्यक्रम भए पनि खराब मौसमका कारण उतै रोकिएपछि अहिले बिहानै बिपी राजमार्ग हुँदै काठमाडौं आउनुभएको बताइन्छ । 

मन्त्रालय स्रोतले बिहान भन्यो, ‘गृहमन्त्री स्थलमार्ग हुँदै धुलिखेल आइपुग्न लाग्नुभएको छ ।’ उहाँ सशस्त्र प्रहरी बल नेपालको स्थापना दिवसको अवसरमा आयोजित विशेष कार्यक्रममा सहभागी हुनैपर्ने कार्यक्रम छ । 

प्रधानमन्त्री केपी शर्मा ओलीको प्रमुख आतिथ्यमा हुन लागेको उक्त कार्यक्रममा गृहमन्त्री लेखक उपस्थित हुनैपर्ने बाध्यता छ । त्यसैले उहाँ बिहान झिसमिसेमा स्थलमार्ग हुँदै काठमाडौं आउनुभएको हो । उहाँको हिजो साँझ ५ बजे बुद्ध एअरको उडानमा बिराटनगरबाट फर्कने कार्यक्रम थियो ।