पाथीभरा घटनाका घाइतेलाई सेनाको स्काई ट्रकमा काठमाडौँ ल्याइयो

 ताप्लेजुङमा प्रहरीको गोली लागेर घाइते तीनजनालाई थप उपचारका लागि काठमाडौँ ल्याइएको छ । 

विराटनगरमा उपचार सम्भव नभएपछि उनीहरुलाई केही बेरअघि नेपाली सेनाको स्काई ट्रकमा राखेर काठमाडौँ ल्याइएको हो । घाइते लिन सेनाको एनए-०६४ स्काई ट्रक काठमाडौँबाट विराटनगर पठाईएको थियो। 

फुङलिङ नगरपालिका– ११ पाथीभरा क्षेत्रमा केबलकार निर्माणको विरोध प्रदर्शनका क्रममा हिजो साँझ भएको झडपमा प्रहरीले गोली चलाउँदा १८ जना घाइते भएका थिए । जसमध्ये यामबहादुर लिम्बू, धर्मान पालुङ्वा र मंगल लावतीको अवस्था गम्भीर छ। 

उनीहरुलाई हिजै विराटनगरस्थित नोवेल मेडिकल कलेजमा भर्ना गरिएकोमा त्यहाँ उपचार सम्भव नभएपछि काठमाडौं रिफर गरेको स्थानीय प्रशासनले जानकारी दिएको छ । झडपमा १३ जना सुरक्षाकर्मी पनि घाइते छन् ।