बलात्कारमा उन्मुक्ति दिएको रविमाथि बात

सहकारी ठगी प्रकरणमा मुद्दा खेपिरहेका राष्ट्रिय स्वतन्त्र पार्टी (रास्वपा) का सभापति रवि लामिछानेले गृहमन्त्री हुँदा बलात्कारको आरोप लागेका एमाले नेतालाई उन्मुक्ति दिएको तथ्य खुलेको छ । 

एमालेसहितको गठबन्धन सरकारमा गृहमन्त्री भएका लामिछानेले पूर्वमन्त्री महेश बस्नेतलाई उक्त आरोपमा जोगाइदिएको रास्वपा नेतृ ज्वाला संग्रौलाले खुलासा गरेकी हुन् । बस्नेतलाई लक्षित गर्दै उनले सामाजिक सञ्जाल फेसबुकमा लेखेकी छन्, ‘रवि दाइले गृहमन्त्री हुँदा जीवनदान दिएको एउटा बलात्कारी आज निकै उफ्रिदै छ रे त साथीहरु । अहिले कुर्सी त्यसको बाउको,त्यसपछि हाम्रो दाइको ! याद गर काजी...!’

बस्नेतलाई खुइल्याउन लेखेको स्टाटसले आफ्नै सभापतिमाथि प्रश्न उठेपछि संग्रौलाले अहिले सच्याएकी छन् । रविको नाम निकालेर उनले लेखेकी छन्, 'एउटा बलात्कारी आज निकै उफ्रिदै छ रे त साथीहरु । अहिले कुर्सी त्यसको बाउको, त्यसपछि हाम्रो दाइको ! याद गर काजी...!’ 

एमाले नेता बस्नेतसँग शोभा पाठक (जानुका) को नाम जोडिँदै आएको छ । लामो समय लिभिङ टुगेदरमा बसेका यी दुईबीचको गुप्त सम्बन्ध बाहिर आएपछि आरोप–प्रत्यारोप चलिरहेको छ ।  

शोभाले केही समयअघि बस्नेतविरुद्ध भ्रुण हत्या,जबरजस्ती करणी र डाँका चोरी प्रकरणमा जिल्ला प्रहरी परिसर काठमाडौंमा जोहरी समेत दिएकी थिइन् । तर, प्रहरीले प्रमाण अपुग भएको भन्दै मुद्दा तामेलीमा राख्न जिल्ला सरकारी वकिल कार्यालय, काठमाडौंलाई सिफारिस गरेको थियो ।