पूर्वराष्ट्रपति पोखरा र विराटनगरको भेटघाट सकेर धरान किचनमा

पूर्व राष्ट्रपति विद्यादेवी भण्डारीले नेकपा एमाले धरानका स्थानीय नेता तथा कार्यकर्तासँग भेटघाट गर्नुभएको छ । विराटनगरबाट सोझै धरान पुग्नुभएका उहाँ बरगाछीस्थित धरान किचनमा अपरान्ह ४ बजे आयोजित भेटघाट कार्यक्रममा सहभागी हुनुभयो । 

सोमबार विराटनगरमा आयोजित पत्रकार सम्मेलनमा उहाँले आफ्नो राजनीतिक जीवन प्रारम्भ सोही स्थानबाट भएको बताउँदै पुराना साथी र नयाँ पुस्तासँग भेट गर्ने उद्देश्यले पूर्व आएको जानकारी दिनुभएको थियो । 

भण्डारीले आफैं पत्रकार भेटघाट आयोजना गर्नु, राष्ट्रिय राजनीतिबारे नियमित अपडेट राखेको भन्नु र आफ्नो विचारलाई अभिव्यक्त गर्न खोज्नुलाई अर्थपूर्ण रुपमा हेरिएको छ । सोही क्रममा उहाँ धरान पुगेर छलफल गर्नुलाई पनि एमाले पंक्तिले सजगतापूर्वक विश्लेषण गरेको अवस्था छ । 

एमालेको एउटा समूह पूर्वराष्ट्रपति भण्डारीलाई पार्टी अध्यक्ष बनाउने उद्देश्यसहित भित्राभित्रै सक्रिय रहेको भनिएको बेला जारी भेटघाटलाई सामान्य रुपमा लिन नहुने बताइन्छ । यद्यपि,प्रधानमन्त्रीसमेत रहेका अध्यक्ष केपी शर्मा ओलीले भण्डारीलाई पार्टी राजनीतिमा फर्काउन प्रयासरत नेताहरुलाई आफू हुँदाहुँदै दायाँबायाँ नसोच्न कडा रुपमा जवाफ दिँदै आउनुभएको छ ।

भण्डारीले केही समयअघि पोखरा पुगेर ‘जनताले आवश्यकता महसुस गरे जिम्मेवारीसहित एमालेमा फर्किने’ बताउनुभएको थियो । विराटनगरमा पनि त्यही आशयको अभिव्यक्ति दिनुभएको छ ।

उहाँको भनाई थियो, ‘राष्ट्रिय राजनीतिका समग्र एजेन्डामा सबै पक्षसँग छलफल गरिरहेको छु’, भण्डारीको भनाई छ, ‘ती एजेन्डा पूरा गर्न कुनै दलमा आवद्ध हुनुपर्यो भने उपयुक्त समय आएपछि निर्णय लिनेछु ।’