अर्थको डाटासम्म पुग्ने मस्कको दाउमाथि अदालतको अँकुश

अमेरिकी राष्ट्रपति डोनाल्ड ट्रम्पको अनुमतिमा विश्वका सर्वाधिक धनी अर्बपति इलन मस्कले ट्रेजरी डिपार्टमेन्टका तथ्याङ्कहरूमा पहुँच पुर्याउन गरेको प्रयासमाथि त्यहाँको अदालतले रोक लगाएको छ ।

न्युयोर्कस्थित म्यानहटन जिल्ला अदालतका न्यायाधीश पल ए एङ्गेलमेयरको इजलासले मस्क नेतृत्वको सरकारी दक्षता विभाग (डिपार्टमेन्ट अफ गभर्नमेन्ट इफिसियन्सी) लाई ट्रेजरी डिपार्टमेन्टको डाटासम्म पहुँचमा प्रतिबन्ध लगाएको हो ।

ट्रेजरी डिपार्टमेन्टमा दशौं लाख अमेरिकीहरूको व्यक्तिगत वित्तीय डेटा रहने व्यवस्था छ । अदालतको आदेशलाई मस्कले गलत भनेका छन् । कानुनमा सरकारी कर्मचारीबाहेक अरू कसैलाई पनि ती अभिलेखसम्मको पहुँचमा प्रतिबन्ध छ । न्युयोर्कका महान्यायाधिवक्ताले ट्रम्प प्रशासनले मस्कलाई व्यक्तिगत डाटामा ‘अभूतपूर्व पहुँच’ दिएको गम्भीर आरोप लगाएका छन् ।