फिल्म डाइरेक्टर हल मालिकको टाउको मालिस गर्न तयार

फिल्म डाइरेक्टर हल मालिकको टाउको मालिस गर्न तयार
सुन्नुहोस्

कुनैपनि चलचित्रको मुख्य आम्दानीको स्रोत नै टिकट बिक्री हुने गरेको छ । करोडौँ लगानीको चलचित्रलाई हल सञ्चालकहरुले पर्दा नदिएपछि कसरी लगाउने उठाउने ? गत शुक्रबारबाट प्रदर्शनमा आएको ‘रंगी’ले यस्तै समस्याको सामना गरिरहेको छ ।

कतिसम्म भने चलचित्रका निर्देशक सुरेश न्यौपानेले हल सञ्चालकहरुको मोजा धोइदिन तयार रहेकोसमेत बताएका छन् । ६० शोसहित प्रदर्शनमा आएको चलचित्र आजसम्म ३० शोमा खुम्चिएको छ । दर्शकले राम्रो प्रतिक्रिया दिँदादिँदै पनि हल सञ्चालकहरुले पर्दा कटौती गरेपछि निर्देशक न्यौपानेले आक्रोश पोखेका हुन् । 

‘हलवालाहरुको मोजा धुन परे पनि म तयार छु, तर फिल्मलाई शो देउ’, उनले भनेका छन्, ‘हामीले शोजका लागि भीख माग्न मात्र बाँकी थियो । राम्रो फिल्म बनाउँदा पनि मार्केट पाउँदैनौँ भने हामीले के गर्ने ?’

दुई महिनाअघि नै चलचित्रको पोस्टर बाँडिएको तर हलहरुले दुई चार दिनअघि मात्रै भित्तामा टाँसेकोमा पनि उनले चित्त दुखाएका छन् ।  ‘म मालिकहरुको टाउको मालिस गर्न पर्छ भने पनि गर्न तयार छु, तर शोज त दिन पर्यो नी ! फिल्म नै नहेरी दुई शोज दिओैं भनेर टेबलमा बसेर दिन मिल्छ ? हामीले उहाँहरूलाई रिझाउन के गर्नुपर्ने हो ?’उनको प्रश्न छ । 

चलचित्रका मुख्य अभिनेता सलोन बस्नेतले पनि हल सञ्चालकहरुप्रति आक्रोश पोखे ।  ‘नेपालमा व्यापार गर्ने ठाउँ दिनुपर्यो नि, हलहरुले ठाउँ नै दिनुहुन्न । म कहाँ गएर फिल्म प्रदर्शन गर्नु ? युट्युबमै रिलिज गर्ने हो भने हलमा किन चलाउनु ?’ उनले सुनाए । हल सञ्चालकहरुले मनोमानी गर्दा चलचित्र विकास बोर्ड भने दर्शक बनेर बसेको उनको आरोप छ । 

उक्त चलचित्रमा बस्नेतसहित नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरूङ, विशाल पहारीलगायतको अभिनय छ ।

टिप्पणीहरू