माइतीघरबाट धर्नाकारीको र्याली एमाले अफिसतिर

एक महिनादेखि काठमाडौँ केन्द्रित आन्दोलन गरिरहेका स्वर्गद्वारी गुठी पीडितहरु आज र्याली गर्दै सत्तारुढ नेकपा एमालेको केन्द्रीय कार्यालय पुग्ने भएका छन् । 

दाङ देउखुरीबाट आएर गौशालास्थित पशुपति धर्मशालामा बसेका र माघ २० गतेदेखि सडक संघर्ष गरिरहेका उनीहरु माइतीघर मण्डलामा केहीबेर प्रदर्शन गरी त्यतैबाट एमाले मुख्यालय च्यासल पुग्ने कार्यक्रम छ । पशुपति धर्मशालाबाट गौशाला, रातोपुल करिडोर, सेतोपुल, अनामनगर, बिजुलीबजार हुँदै उनीहरु माइतीघर आइपुगेका छन् । 

स्वर्गद्वारी गुठी पीडित मोही किसान संघर्ष समितिका सदस्य खुशीराम चौधरीको नेतृत्वमा नाराबाजीसहित धर्नामा बसिरहेका उनीहरु एक घण्टापछि र्यालीसहित च्यासल जाने बुझिएको छ । स्वर्गद्वारी आश्रमको जग्गा मोहियानी हकअनुसार पाउनुपर्ने संघर्ष समितिको माग छ । 

त्यसअनुसार कानुन बनाउन सरकार र सरोकारवालाहरुलाई ध्यानाकर्षण गराए पनि वेवास्ता गरिएको पीडितको दु:खेसो छ । सरकारले विगतमा गरेको सहमति पालना नगरेको भन्दै उनीहरु आन्दोलनमा उत्रिएका हुन् ।