बालेनको घरमा प्रचण्डलाई भव्य स्वागत

पूर्व प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल प्रचण्डले वर्तमान सरकार मीटरब्याज पीडितको समस्या समाधान गर्ने दायित्वबाट पन्छिएको टिप्पणी गर्नुभएको छ । 

हुलाकी राजमार्ग केन्द्रीत पार्टीको तराई-मधेश जागरण अभियानका क्रममा आज महोत्तरीको जलेश्वर नगरपालिका पुग्नुभएका उहाँले स्थानीय पीडितहरुसँग कुराकानी गर्दै यस्तो बताउनुभएको हो । आफू तत्कालीन प्रधानमन्त्री हुँदा मीटरब्याज पीडितहरुलाई न्याय दिलाउन पटक-पटक पहल गरेको र कतिपयको लालपुर्जासमेत फिर्ता भएको प्रचण्डले स्मरण गराउनुभयो । 

तर, नेकपा (एमाले) र नेपाली कांग्रेसको वर्तमान गठबन्धन सरकारले पीडितहरुलाई प्राथमिकता नदिएको बताउँदै भन्नुभयो, ‘सरकारको ध्यान यस्ता समस्यातिर गएकै छैन, उसको ध्यान त भ्रष्टाचारीलाई संरक्षण गर्नेतिर मात्रै हो ।’ 

सो क्रममा करिब तीन दर्जन मीटरब्याज पीडितले प्रचण्डसँग न्याय दिलाउन सहयोग मागेका थिए । उहाँले पनि सरकारलाई खबरदारी गरेर समस्या समाधानको लागि पहल थाल्ने प्रतिबद्धता जनाउनुभएको छ । 

उक्त कुराकानीपछि प्रचण्डलाई एकडरा गाउँपालिकाले भव्य स्वागत गरेको छ । जनप्रतिनिधि र कर्मचारीहरुले गाउँपालिकाको कार्यालयमा स्वागत गरेका हुन् । 

रोचक संयोग के छ भने, प्रचण्डलाई स्वागत गरिएको उक्त घर काठमाडौँ महानगरपालिकाका मेयर बालेन साहको पुख्र्यौली घर हो । अहिले उक्त घरलाई गाउँपालिकाले भाडामा लिएर कार्यालयको रुपमा प्रयोग गर्दै आएको छ ।