फिल्म पछाडि धकेलिएपछि महानायकबारे बेग्लै चर्चा
करिब आठ वर्षपछि ठूलो पर्दामा देखिन लागेका महानायक राजेश हमालको कमब्याक चलचित्र ‘नरसिंह अवतार’को प्रदर्शन मिति सरेको छ । चैत २९ गतेदेखि प्रदर्शनमा आउने प्रचार गरिएकोमा उक्त दिन अरु दुई चलचित्रसँग जुध्ने भएपछि निर्माण टिमले पछाडि सारेको छ । हाल प्रदर्शनको नयाँ मिति नतोकिए पनि आगामी वर्षको जेठसम्म पुग्ने बुझिएको छ ।
स्रोतका अनुसार महानायक हमालसमेतको सल्लाहमा निर्माताले नयाँ प्रदर्शन मिति तय गर्ने छन् । नेपाली चलचित्र क्षेत्र सीमित रहेको र त्यसमा पनि राम्रा फिल्म जुधाउँदा चलचित्रकर्मीलाई नै नोक्सानी पुग्ने हमालको धारणा छ ।
निर्माण टिमका एक सदस्य भन्छन्, ‘निर्माता र निर्देशकज्यू अरु चलचित्रसँग जुधे पनि पूर्व निर्धारित मितिमै प्रदर्शन गर्ने मनस्थितिमा हुनुहुन्थ्यो, तर राजेश दाइले मान्नु भएन ।’
बताइएअनुसार अहिले धमाधम चलचित्रको पोस्ट प्रोडक्सनको काम भइरहेको छ । चलचित्रमा हमालसहित सरोज खनाल, नीति शाह, उषा खड्की, सनिषा भट्टराईलगायतको अभिनय छ ।
यसैबीच महानायक हमाल राजनीतिमा प्रवेश गर्न लागेको चर्चाले सिनेवृत्त गर्माएको छ । स्रोतले पछिल्लो समय उनी विभिन्न राजनीतिक दलका नेताहरुसँग निरन्तर संवादमा रहेको दाबी गरेको छ । यद्यपि राजनीति प्रवेशको सम्भावनाबारे हमाल स्वयम्ले इन्कार गरेका छन् ।
टिप्पणीहरू