मोर्चाले एक लाख मान्छे उतार्ने, बाँकी निर्णय छिट्टै

चार राजनीतिक दल सम्मिलित समाजवादी मोर्चाले आगामी चैत १५ गते आयोजना गर्न लागेको बृहत जनासभाको तयारी तीब्र पारेको छ । 

चैत १ गते बसेको मोर्चाको १२औँ बैठकले मुलुकमा प्रतिगामी र बाह्य शक्तिको चलखेल बढेको निष्कर्ष निकाल्दै गणतन्त्रको पक्षमा र्यालीसहित जनसभा गर्ने निर्णय गरेको थियो । सोहीअनुसार मोर्चामा आवद्ध दलहरुले जिम्मेवारी बाँडफाँड गरेर तयारी अघि बढाएका छन् । 

जनसभा प्रदर्शनीमार्गस्थित भृकुटीमण्डपमा गर्ने तय भएको नेकपा (माओवादी) केन्द्रका सचिव तथा सांसद देवेन्द्र पौडेलले जनआस्थालाई जानकारी दिए । उनका अनुसार कार्यक्रममा देशभरबाट करिब ८० हजारदेखि एक लाख हारहारीमा कार्यकर्ता जुट्ने मोर्चाको अनुमान छ ।

‘खुलामञ्चमा अहिले महानगरले प्रतिबन्ध लगाएको कारण भृकृटीमण्डमा गर्ने मोटामोटी टुंगो लागेको छ’, पौडेलले भने, ‘न्यूनतम ८० हजारदेखि एक लाखसम्म जनता त्यहाँ आउँछन् ।’ 

त्यस्तै, जुलुल र र्यालीका लागि रुट तय गर्नेबारे मोर्चामा छलफल चलिरहेको छ । ‘उपत्यकाको विभिन्न ठाउँमा भेला भएर जुलुस निकाल्दै भृकृटीमण्डप पुग्ने कार्यक्रम छ, त्यसका लागि अहिले कुन कुन रुट प्रयोग गर्ने, कसलाई कमाण्ड गर्न दिने भन्नेबारे अन्तिम छलफल गर्दैछौँ’, उनले भने । 

मोर्चामा आवद्ध सबै पार्टीका शीर्ष नेताले सभालाई सम्बोधन गर्नेछन् । यद्यपि, अन्य दल तथा गणतन्त्रवादी नेताले पनि सम्बोधन गर्नसक्ने पौडेलले बताए । 

तराइ-मधेश जागरण अभियानअन्तर्गत गृहजिल्ला चितवनमा रहेका माओवादी केन्द्रका अध्यक्ष पुष्पकमल दाहाल प्रचण्ड काठमाडौँ फर्किएपछि थप छलफल गरेर वक्ता तय गरिने बताइएको छ । प्रचण्ड आज साँझ वा भोलि बिहानसम्म काठमाडौँ आइपुग्ने बुझिएको छ । 

एकीकृत समाजवादीले १५ गतेको कार्यक्रममा उपस्थित हुन विभिन्न तहका पार्टी कमिटी र जनवर्गीय संगठनहरुलाई परिपत्र गरेको छ । काठमाडौँ आउन सम्भव भएका नेता-कार्यकर्तालाई यतै आउन भनिएको छ भने अन्यको हकमा आ-आफ्नो जिल्लामै गणतन्त्रको पक्षमा आयोजना हुने जुनसुकै आमसभा, प्रदर्शन तथा संघर्षका कार्यक्रममा सक्रिय हुन निर्देशन दिइएको छ ।