नापी कार्यालयको नाम हुनुपर्नेमा ‘आई लभ यू प्रमिला’

रुकुम पश्चिमको आठबिसकोटस्थित नापी कार्यालयको डिजिटल बोर्ड ह्याकरको कब्जामा पुगेको छ । बोर्डमा ‘आई लभ यू प्रमिला, आई रियल्ली लभ यू’ डिस्प्ले भएको छ ।  

आठबिसकोट नगरपालिकाका सूचना अधिकारी इन्द्रबहादुर विष्टका अनुसार हिजो रातिबाट त्यस्तो भएको हो । ह्याकरले डिजिटल बोर्डबाट कार्यालयको नाम हटाएर अर्कै शब्द लेखेको उनको भनाइ छ । 

उनले नापी कार्यालय नगरपालिका मातहत नरहेको बताए । ‘उक्त नापी कार्यालय संघीय सरकारको हो । हिजो राति बोर्ड ह्याक भएको रहेछ,’ सूचना अधिकारी विष्टले भने, ‘कार्यालय प्रमुख पनि बाहिर जानुभएको रहेछ । हामीले उहाँलाई खबर गरिदिएका छौं ।’

डिजिटल बोर्ड ह्याकबारे अनुसन्धान गर्न स्थानीय प्रहरीलाई जानकारी गराइएको उनले बताए । केही दिनअघि नेपाल विद्युत प्राधिकरणको भरतपुर वितरण केन्द्रको पनि डिजिटल बोर्ड ह्याक गरेर प्रधानमन्त्री एवं नेकपा एमालेका अध्यक्ष केपी शर्मा ओलीविरुद्ध नारा लेखिएको थियो । 

डिजिटल बोर्डको डिस्प्लेमा ‘केपी चोर, देश छोड’ भन्ने शब्द देखिएपछि एमालेका कार्यकर्ताले केन्द्रका प्रमुख रामु श्रेष्ठमाथि आरोप लगाउँदै कुटपिटसमेत गरेका थिए ।