पत्नीलाई अलपत्र, कान्छीसँग मन्त्रीको सत्र

लामो समयदेखि ‘लिभिङ टुगेदर’ मा रहँदै आएका ओली सरकारका एक मन्त्रीले घरमा बिमार श्रीमती रश्मी हुँदाहुँदै प्रेमिकासँगको सम्बन्धलाई वैध बनाएका छन् । पूर्वसांसदसमेत रहेकी निर्जला राउतलाई श्रममन्त्री शरदसिंह भण्डारीले विधिवत् पत्नीको दर्जा दिएर मन्त्रालयकै लेटरहेडमा सिफारिस गरेको भेटिएपछि जनआस्थाले खोजी–नीति गर्दै जाँदा प्रमाण भेटिएको हो ।    

मन्त्रीको कान्छी पत्नी बनेकी निर्जला डिभोर्सी हुन् । भारतीय मूलका अमेरिकी नागरिक कृष्णनसँग केही वर्षअघि नै सम्बन्धविच्छेद गरेर नेपाल फर्किएकी उनीसँगै भण्डारी लामो समयदेखि लिभिङ टुगेदरको सम्बन्धमा भैंसेपाटीमा रहँदै आएका थिए । उनीहरूले केही अघि मात्र महोत्तरीको एउटा स्थानीय तहबाट विवाह दर्ता गरेको बुझिएको छ । निर्जलाको पूर्व पतिबाट दुई छोरी छन्, उनीहरूले थर पनि राउत नभई कृष्णन् नै लेख्छन् । ती अमेरिकामै छन्, दुवै छोरीले स्नातकोत्तर तहको अध्ययन सिध्याइसकेका छन् । निर्जला मधेस आन्दोलन ०६३ देखि नेपालमै  बस्न थालेकी हुन् ।

नागरिकताअनुसार सिरहा जिल्ला, बस्तीपुर– २ पक्कीटोलकी बासिन्दा हुन् र अस्थायी रूपमा ललितपुरको भैंसेपाटीमा बस्दै आएकी छन् । जुन दिनदेखि निर्जला भित्रिइन्, त्यहीँबाट कांग्रेसको राजनीति त्यागेर शरद्सिंह निरन्तर मधेसकेन्द्रित राजनीतिमा सक्रिय  छन् । पञ्चायतदेखि गणतन्त्र कालसम्म दल फेरेर मन्त्री बन्दै आएका उनले ०४६ पछि बल्ल कांग्रेसको राजनीति थालेका हुन् । भण्डारीले यसबीच गर्लफ्रेण्ड निर्जलालाई दुई पटक सांसद बनाइसके । ०६४ मा उपेन्द्र यादवले रेणु यादवलाई उकास्दा निर्जला सांसद बन्न सकेकी थिइनन् तर ०७० को दोस्रो संविधानसभा हुँदै ०७४ को प्रतिनिधिसभामा समानुपातिक सांसद नै भेट्टाइन् । 

निर्जलाले पूर्व पतिसँग डिभोर्स गरेर शरदसिंहसँग वैवाहिक नाता जोडे पनि शरद्ले भने पहिलो पत्नीसँग सम्बन्ध तोडेका छैनन् । पत्नी रश्मी हात्तीपाइले रोगबाट दुई दशकदेखि लडिरहेकी छन् । स्याहार सुसार चाहिने बेला भण्डारी पत्नीको ख्याल नगरी कान्छीसँग रमाइरहेकै थिए । अहिले उनैलाई कान्छी बनाएका हुन् ।

समाचार स्रोतका अनुसार, महोत्तरीको औरही नगरपालिकाका मेयर नातामा निर्जलाकी बहिनी–ज्वाइँ हुन् । त्यही सम्बन्धलाई प्रयोग गरेर सोही नगरपालिकाको वडाबाट निर्जला र शरदसिंहले विवाह दर्ताको प्रमाणपत्र बनाएको बुझिएको छ । जेठी पत्नीबाट शरदसिंहका तीन छोरी छन्, जेठी रास्वपा सांसद विराजभक्त श्रेष्ठलाई दिइएको छ भने माइली अष्ट्रेलिया बस्छिन् । कान्छीले केही महिनाअगाडि मात्र विवाह गरेकी हुन् ।

१९ औं पटक मन्त्री बनेर रेकर्ड राखेका भण्डारी र निर्जलाको संयुक्त लगानीमा बर्दिबासमा होटल र हस्पिटल व्यवसायदेखि जलविद्युत् परियोजनासम्म रहेको छ । पछिल्लो समय छायाँ मन्त्रीको रूपमा उनै निर्जलाको दवदवा रहेको श्रम मन्त्रालय स्रोतले जनाएको छ । हालै मात्र विभिन्न मुलुकमा श्रम सहचारी र श्रम काउन्सेलर नियुक्ति गर्दा निर्जला हावी भएको भन्दै असन्तुष्टि व्याप्त छ । पहिलो पत्नीसँग डिभोर्स नगरी कान्छी भिœयाएका शरदसिंहलाई जो कसैले जिल्ला प्रशासन, सरकारी वकिल तथा अदालतमा मुद्दा चलाएको खण्डमा लाग्ने कानुनका जानकारहरूले प्रतिक्रिया दिएका छन् ।