वार्षिक परीक्षापछि फुर्सदिला शिक्षकहरु सडक तताउने रणनीतिमा

देशभरका शिक्षकहरु राजधानी आउन थालेका छन् । लामो समयदेखि विद्यालय शिक्षा ऐन जारीको माग गर्दै आएका उनीहरुले भोलिदेखि अनिश्चितकालीन सडक आन्दोलन गर्न लागेका हुन् । देशभरका करिब चार लाख शिक्षक आन्दोलनमा सहभागी हुने नेपाल शिक्षक महासंघले जनाएको छ । 

आन्दोलनकारी शिक्षकहरुलाई अनिवार्य विद्यालय पोशाक पहिरिन निर्देशन दिइएको छ । भोलि माइतीघरमा भेला भएर नयाँ बानेश्वरसम्म जुलुस निकाल्ने उनीहरूको तयारी छ । 

महासंघले आन्दोलनकारीहरुका लागि छ बुँदे निर्देशन समेत जारी गरेको छ । माइतीघर मण्डलाबाट नयाँ बानेश्वरतर्फ क्रमश कोशी, बागमती, मधेश, कर्णाली, सुदूरपश्चिम, लुम्बिनी र गण्डकी प्रदेशका शिक्षकहरुलाई लहर मिलाएर उभिन भनिएको छ । आन्दोलन परिसरमा रहेका बोट विरुवाको संरक्षण गर्न एवम् कुनै भोतिक र जैविक क्षति नगर्न पनि महासंघको निर्देशन छ । शिक्षकहरुलाई आफूले प्रयोग गरेको पानीको बोटल तथा सामाग्रीहरु जथाभावी नफाल्न पनि भनिएको छ । 

एक महिनाअघि पनि शिक्षकहरुले संसदको हिउँदे अधिवेशनबाट शिक्षा ऐन जारी गर्न माग गर्दै प्रदर्शन गरेका थिए । तर आजबाट अधिवेशन अन्त्य गरिएको छ । पछिल्लो समय मुलुकको राजनीतिक घटनाक्रमले राजधानीको सुरक्षा व्यवस्थामा चुनौती थपिएको बेला शिक्षकहरुको आन्दोलनले थप प्रभाव पार्नसक्ने कतिपयको अनुमान छ । अहिले विद्यालयमा वार्षिक परीक्षा सकिएकाले उल्लेख्य मात्रामा शिक्षकहरु राजधानी आउने अनुमान छ ।