ती दुर्गा र यी दुर्गा

आफ्नो स्वार्थपूर्तिका लागि व्यक्तिले के सम्म गर्छ ? विवादित मेडिकल व्यवसायी दुर्गा प्रसाईंलाई हेर्दा छर्लङ्ग होइन्छ । कुनै समय पूर्वराजा ज्ञानेन्द्र वीरविक्रम शाहको चर्को विरोध गर्ने प्रसाईं अहिले राजा फर्काउन जोडतोडका साथ लागिपरेका छन् । उनलाई पूर्वराजा ज्ञानेन्द्रले गत चैत १५ गतेलाई राजावादी आन्दोलनको ‘कमाण्डर’ तोकेका थिए । जनताले जरैबाट उखालेर फालिसकेको राजतन्त्र ब्युँताउनका निम्ति गरिएको आन्दोलन उनकै उक्साहटमा उग्र बन्न पुग्यो । 

अहिले राजाको ‘दाहिने हात’ बनेर हिँडेका प्रसाईंले दुई वर्षअघि एपीवान एचडीको एउटा अन्तरवार्तामा ‘राजा ल्याउँछु भन्नु मूर्खता हो’ भनेका थिए । त्यतिबेला उनको भनाइ थियोे,‘राजा मेरो छोराको बिहेमा आउने होइन,पार्टीमा आउने पनि होइन, मलामीमा जाने पनि होइन । राजाको विरोध गरेर कुनै कामै छैन,म जम्मैलाई भन्छु । राजा भनेको इनोसेण्ट मान्छे हो । राजालाई ल्याएर कसैले गध्दीमा राख्छु भन्यो भने त्योभन्दा मूर्ख कोही पनि हुँदैन ।’

हाल तिनै प्रसाईँ राजालाई गध्दीमा फर्काउँछु भनेर अराजकता फैलाउँदै हिँडेका छन् । त्यसो भए के प्रसाईं मूर्ख हुन् ? होइन,उनी आफ्नो फाइदा जता हुन्छ, त्यतै लाग्ने व्यक्ति हुन् । विगतमा एमाले अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई आफ्नै निवासमा बोलाएर मार्सी भात खुवाएका प्रसाईं अहिले उनीहरुकै खोइरो खनिरहेका हुन्छन् । त्यता ‘दाल नगलेपछि’ पूर्वराजातर्फ ढल्किएका उनले आफ्नो स्वार्थको रोटी सेक्नका लागि मात्र राजतन्त्रको मुकुट भिरेको प्रष्टै छ।

आफ्नो स्वार्थ पुरा नभएमा उनी हात धोएर पूर्वराजालाई खुइल्याउन लाग्ने निश्चय नै छ । सामाजिक सञ्जाल प्रयोगकर्ता तेजन राजवंशीले प्रसाईंजस्तो अवसरवादीको पछाडि लाग्ने महापागल भएको बताएका छन् । उनले लेखेका छन्,‘यो अवसरवादी हो । यसको पछि लाग्ने महापागल हो ।’

खड्का नेपालले ‘फटाहा’ हरुको पछाडि लागेर ज्यान नफाल्न सुझाव दिएका छन् । ‘यस्ता फटाहाका पछि लागेर हामी सोझा जनताले ज्यान नफालौं,यस्ता अवसरवादीका पछि लागेर फाइदा होइन,उल्टै घाटा मात्रै हो’,उनले भनेका छन् । 

इन्दिरा शर्मा प्रसाईं लेख्छिन्,‘यो दुर्गे भन्ने मान्छे जता फाइदा त्यतै लाग्छ । पहिला राजा ल्याउनु मूर्खता हो भन्थ्यो । अहिले उही राजा ल्याउन लागिरहेको छ । पहिला माओवादीमा लाग्यो, त्यसपछि एमालेमा लाग्यो अहिले राजा ल्याउँछु भन्छ ।’ कतिपयले प्रसाईंलाई ‘छेपारो’ पनि भनेका छन् ।