आफ्नो समुदायमाथि दाग लगाउन योजना बुनिएको मुस्लिम समाजको आरोप

नेपाल मुस्लिम समाज संघले गत चैत ३० गते पर्साको वीरगञ्जमा भएको घटना योजनाबद्ध रुपमा गरिएको दाबी गरेको छ । मुस्लिम समुदायमाथि दाग लगाउने प्रयासस्वरुप हिन्दू धर्मावलम्बीहरुद्वारा सुनियोजित रुपमा उक्त घटना भएको संघको आरोप छ । 

गत चैत ३० गते हनुमान जयन्तीको अवसरमा निकालिएको शोभा यात्रामा हिन्दू र मुस्लिम समुदायबीच विवाद भएपछि आगजनी र हिंसात्मक घटना भएको थियो । संघले आज सरोकारवाला निकायलाई ज्ञापनपत्र बुझाउँदै गत वर्ष पनि वीरगञ्जमा यस्तै प्रकृतिको क्रियाकलाप देखिएको जनाउँदै यो पटकको घटना सोही शृंखलाको अर्को कडी भएको ठहर गरेको छ ।

‘वीरगञ्जको घटना कुनै आकस्मिक झडप थिएन, यो पूर्ण रुपमा योजनाबद्ध, संगठित र लक्षित आक्रमण थियो,’ संघले भनेको छ, ‘घटनाका विभिन्न भिडियो, प्रत्यक्षदर्शीका बयान र भौतिक प्रमाणहरुले देखाउँछन् कि कसरी हतियारसहितका केही उग्रतावादी युवाहरु मुस्लिम बस्तीहरुमा जुलुस लगाएर उत्तेजक नाराबाजी, तोडफोड, गालीगलौज र आतंक फैलाउँदै हिँडे ।’

बारम्बार मुस्लिम बस्ती र समुदायलाई लक्षित गरेर यस्ता घटना भइरहेको भन्दै संघले कथित ‘सेना’ नामधारी उग्र समूहहरुको खुलेआम अराजक गतिविधि बढ्नुमा राज्यसत्ता र सुरक्षा संयन्त्रको उपहास प्रमुख कारण रहेको बताएको छ । 

संघले घटनाको दीर्घकालीन समाधान सुनिश्चित गर्न उच्चस्तरीय छानबिन आयोग गठन गर्नुपर्नेसहित दोषीलाई सार्वजनिक रुपमै सख्त कारबाही, प्रहरी प्रशासनको भूमिकाबारे छानबिन र प्रशासनले लिएको ड्रोन क्यामरा र सीमा नाकामा रहेका सीसीटिभीको भिडियो सार्वजनिक गरी छानबिन गर्नुपर्नेसमेत माग गरेको छ ।