विद्या भण्डारीको सम्पर्क कार्यालयमा धमाधम काम

पूर्वराष्ट्रपति तथा नेकपा एमालेका तत्कालीन उपाध्यक्ष विद्यादेवी भण्डारीले सम्पर्क कार्यालय बनाउन लागेको भनिएको घरमा मर्मत सम्भारको काम धमाधम चलिरहेको छ । 

नयाँ बानेश्वरको थापागाउँस्थित चार तले घरमा अहिले सरसफाई, झ्याल-ढोका मर्मत, बत्ति जडान, फर्निचर, सजावट लगायतका काम तीब्र गतिमा भैरहेको छ । केही दिनमै सम्पर्क कार्यालयको औपचारिक उद्घाटन गर्ने तयारी छ ।

२०४८ सालमा तत्कालीन एमाले महासचिव मदनकुमार भण्डारीले समेत चुनाव प्रचार प्रसारका लागि प्रयोग गरेको यो घर विदुर मैनालीको हो । एमालेका पुराना नेता उनी काठमाडौँ महानगरपालिकाका पूर्वउपमेयर पनि हुन् । 

मदनको निधनपछि ०५१ सालको मध्यावधि निर्वाचनमा काठमाडौँ-१ बाट उम्मेदवार रहेकी विद्याको चुनाव प्रचारको थलो पनि यहि घर बन्यो । ३१ वर्षपछि फेरि यहीबाट विद्याको राजनीतिक गतिविधि अघि बढ्ने छ । 

यद्यपि औपचारिक रूपमा भने मदन भण्डारी फाउन्डेसनको नाममा कार्यालय संचालन गर्ने तयारी छ ।