सत्तातर्फको कुर्सीमा बस्न रहर गर्दै सभामुखलाई पत्र

सरकारलाई दिएको समर्थन फिर्ता लिए पनि सत्ता गठबन्धनको बैठकमा सहभागिता जनाउने गरेको नागरिक उन्मुक्ति पार्टी (नाउपा) ले सत्ता पक्षमै बस्ने रहर गरेको छ । 

अध्यक्ष रञ्जिता श्रेष्ठले प्रतिनिधि सभामा सत्तापक्षको लहरमा बस्ने व्यवस्थापन मिलाइदिन आज सभामुख देवराज घिमिरेलाई पत्र लेखेकी छन् । आजको बसेको कार्यव्यवस्था परामर्श समितिको बैठकमा सभामुखले यो कुरा जानकारी गराएका हुन् । 

गत असार २२ गते सरकारलाई दिएको समर्थन फिर्ता लिदैँ प्रतिपक्षीको लहरमा बसेकाे नाउपाले डेढ महिनामै निर्णय बदलेको हो । त्यसो त पती-पत्नीको घर झगडाले यो पार्टी आफैँ आन्तरिक किचलोमा फसेको छ । 

संरक्षक रेशम चौधरी पक्षले बहुमत केन्द्रीय सदस्यको भेला बोलाएर रञ्जितालाई अध्यक्षबाट बर्खास्त गरेकोमा निर्वाचन आयोगले मान्यता नदिएपछि उनी पुनर्बहाली भएकी छन् । प्राविधिक हिसाबले मात्र अध्यक्ष रहेकी उनको यो निर्णयले नाउपामा थप किचलो चर्किने देखिन्छ ।

नाउपाको आन्तरिक विवादलाई सत्ताधारी ठूला दलले पनि आफू अनुकूल प्रयोग गर्ने गरेको पाइन्छ । जस्तो, नाउपाबाट सरकारमा सहभागी भएका संस्कृति, पर्यटन तथा नागरिक उड्डयन राज्यमन्त्री अरुण चौधरीले एक महिना पहिले नै राजीनामा दिएका थिए । तर, प्रधानमन्त्री केपी शर्मा ओलीले अहिलेसम्म उनको राजीनामा स्वीकृत गरेका छैनन् । 

रञ्जिताले सत्ता पक्षमा बस्ने निर्णय गरेसँग चौधरीले पनि राजीनामा फिर्ता लिनसक्ने अनुमान छ ।