लिङ्देनका पिएद्वारा कुटिएका राप्रपा कार्यकर्ता अनसन बस्ने

राष्ट्रिय प्रजातन्त्र पार्टी (राप्रपा)का अध्यक्ष राजेन्द्रप्रसाद लिङ्देनका स्वकीय सचिव क्षत्र कडायतद्वारा कुटिएका राजु गैरे अनसन बस्न लागेका छन् । 

राजनीतिक संरक्षणमा आफूमाथि अन्याय भएको बताउँदै उनले भदौ १० गतेदेखि आमरण अनसन बस्ने निधो गरेका हुन् । अध्यक्ष लिङ्देनको उक्साहटमा आफूमाथि आक्रमण भएको गैरेको दाबी छ ।   

गत साउन १४ गते काठमाडौँको एक रेष्टुरेन्टमा कडायतले गैरेलाई कुटेका थिए । गैरेको टाउकोमा हेल्मेटले हानेको सिसिटिभी फुटेज सामाजिक सञ्जालबाट सार्वजनिक भएको थियो । तर, यत्रो  प्रमाण बाहिर आइसक्दा पनि प्रहरीले जाहेरी लिन नमानेको उनको गुनासो छ । 

किटानी जाहेरी लिन नमानेको प्रहरीले राजनीतिक आडमा मिलापत्र गर्न दबाब दिइरहेको उनले बताएका छन् । यसमा लिङ्देनको भूमिका रहेको उनको ठम्याई छ । 

'अध्यक्षको स्वकिय सचिवजस्तो व्यक्तिले कुट्नु र अध्यक्षले कार्वाही गर्न त परै जावस् उल्टै बढिगाडको रुपमा लिएर हिँड्नुले प्रष्ट हुन्छ यो अध्यक्षकै निर्देशनमा भएको हो र गर्न लगाइएको हो', गैरेको गुनासो छ ।  

गैरे ०७९ को निर्वाचनमा राप्रपाबाट प्रदेश सभा सदस्यको उम्मेद्वार थिए । राप्रपाले लिङ्देनविरुद्ध सामाजिक सञ्जालमा जथाभावी लेखेर अनुशासनहीन काम गरेको आरोप उनीमाथि थोपरेको छ ।