भैरहवा एयरपोर्टबारे नयाँ दिल्लीमा छलफल

संस्कृति, पर्यटन तथा नागरिक उड्डयनमन्त्री बद्रिप्रसाद पाण्डेले भैरहवा विमानस्थल नियमित सञ्चालन गर्नका लागि प्रधानमन्त्री केपी शर्मा ओलीको भारत भ्रमणका क्रममा छलफल हुने जानकारी दिनुभएको छ ।

आज राष्ट्रिय सभा बैठकमा सांसद मायाप्रसाद शर्माले राखेको जिज्ञासाको जवाफ दिँदै उनले एयर रुटका विषयमा दिल्लीमा छलफल हुने बताएका हुन् । यस विषयलाई महत्वका साथ भ्रमणमा उठाउने र रुटका बारेमा स्पष्ट हुनेगरी वार्ता गर्ने मन्त्रीको दावी छ । 

‘प्रधानमन्त्रीज्यूको भारत भ्रमणको पूर्वसन्ध्यामा हामीले प्राप्त गर्नुपर्ने रुटका विषयमा बाहिर र भित्र आवागमन दुवैका लागि रुटहरु आवश्यक पर्दछ’, उहाँले भन्नुभयो, ‘केबल सिमरानेरको रुटमात्रै आउने जाने छ । यो विषयलाई महत्वका साथ भ्रमणमा उठाउने, रुटका बारेमा स्पष्ट हुने । भैरहवा विमानस्थललाई संसारभरका बुद्ध धर्मावलम्बीहरुलाई काठमाडौं नआइकनै आउन, जानसक्ने व्यवस्था मिलाउने गरी काम गरिरहेका छौँ ।’

भैरहवा र पोखरा विमानस्थल सुचारु गर्न वर्तमान सरकार बनेपछि क्याविनेटले कार्ययोजना पास गरेको पनि पाण्डेले बताउनुभयो । एयरपोर्ट चलायमान बनाउन भिसा सेन्टर, अध्यागमन, श्रम कार्यालय, क्वारेन्टाइनलगायत आवश्यक सबै संरचना निर्माण गर्नेगरी सरकार अघि बढिरहेको उहाँको भनाइ छ ।

मन्त्री पाण्डेले यसबारे क्रमशः सकारात्मक परिणाम देख्न सकिने जिकिर गर्नुभएको छ ।