बुटवलमा एमसीसीको नयाँ प्रोजेक्ट, बिजुली भारत निर्यातमा सहयाेगी हुने दाबी

अमेरिकी सहयोग परियोजना एमसीसीको आर्थिक सहयोगमा बुटवल नजिकैको सुनवलमा १८ किमि प्रसारण लाइन निर्माणको शुभारम्भ गरिएको छ । एमसिए–नेपालले सुनवलमा आयोजित एक समारोहमा अर्थमन्त्री रामेश्वरप्रसाद खनाल र नेपालका लागि अमेरिकी राजदूत डिन आर. थम्प्सनले न्यू बुटवल सबस्टेसनको १८ किमि प्रसारण लाइन निर्माणको औपचारिक शुभारम्भ गरेका हुन् ।  

एमसिए–नेपालको कम्प्याक्ट कार्यक्रमअन्तर्गत निर्माण हुन लागेको यो पूर्वाधारले नेपालको विद्युतीय सञ्जाल सशक्त बनाउने र नेपाल–भारतबीच ऊर्जा व्यापारको नयाँ मार्ग खोल्ने एमसिए नेपालले जनाएको छ । कार्यक्रममा अर्थमन्त्री खनालले स्वच्छ ऊर्जामा पहुँच विस्तार, क्षेत्रीय ऊर्जा व्यापारमा वृद्धि र दीर्घकालीन आर्थिक विकासका लागि नेपाल सरकार प्रतिबद्ध रहेको जनाउँदै एमसीसी र एमसिए–नेपालको सहयोगमा यसअघि भएका सम्झौतालाई कार्यान्वयन गर्ने प्रतिबद्धता उल्लेख गरे ।

त्यसैगरी अमेरिकी राजदूत थम्प्सनले भने, ‘नेपालसँग ऊर्जा प्रणाली सुदृढ गर्न एक प्रतिबद्ध साझेदारका रूपमा उभिन पाउँदा संयुक्त राज्य अमेरिकालाई गर्व लागेको छ। प्रसारण लाइन र सबस्टेशनले घरपरिवार र व्यवसायको बिजुली आपूर्ति मात्र होइन, यस क्षेत्रका व्यापार र प्रगतिका अवसर पनि सिर्जना गर्नेछ।’

उक्त १८ किमि प्रसारण लाइनले ४०० केभी न्यू बुटवल सबस्टेसनलाई नेपाल–भारत सीमासम्म जोड्ने बताइएको छ । करिब पाँच करोड अमेरिकी डलरको लगानीमा निर्माण गर्न लागिएको उक्त पूर्वाधारले आगामी दशकमा १० हजार मेगावाट बिजुली निर्यात गर्ने लक्ष्य पूरा गर्न नेपाललाई सहयोग गर्ने एमसिए नेपालको दाबी छ । यसबाट नेपाल–भारत ऊर्जा साझेदारीलाई मजबुत बनाउँदै देशको आर्थिक र ऊर्जा सुरक्षामा नयाँ ढोका खोल्ने जनाइएको छ ।

मिलेनियम च्यालेञ्ज एकाउण्ट नेपाल विकास समिति (एमसिए–नेपाल) २०७५ वैशाखदेखि क्रियाशील छ । यसले मुलुकको विद्युत् प्रसारण सञ्जालविस्तार गर्न, यातायात लागत घटाउन र निजी क्षेत्रको विकासका लागि नयाँ अवसरहरू सिर्जना गर्न नेपाल सरकारको १९.७० करोड र अमेरिकी सरकारको एमसीसीबाट प्राप्त ५५ करोडको अनुदान गरि कुल ७४.७ करोड अमेरिकी डलर खर्च गर्ने लक्ष्य राखेको छ ।