भारतमा व्यापारी भनेर चिनिएका कांग्रेसको सूचीमा
आउँदो फागुन २१ गते हुन गइरहेको प्रतिनिधिसभा निर्वाचनका लागि नेपाली कांग्रेसले निर्वाचन आयोगमा बुझाएको समानुपातिकको बन्दसूचीप्रति सर्लाही जिल्ला कार्यालयले आपत्ति जनाएको छ । पार्टी संगठनमा कहिल्यै नामै नसुनेको र भारतमा व्यापार गर्दै आएको व्यक्तिलाई सर्लाहीबाट बन्दसूचीमा राखिएको भन्दै विरोध जनाइएको हो ।
सर्लाही जिल्ला कार्यालयका कार्यवाहक सभापति डा.सरोज कुमारले आज केन्द्रीय कार्यसमितिलाई परिपत्र गर्दै यसबारे ध्यानाकर्षण गराएका छन् । उनका अनुसार बन्दसूचीमा परेका मो.अन्सार खाँ पार्टीको कँही कतै समितिबाट सिफारिस नभएको, पार्टी संगठनमा कहिल्यै नदेखिएको नाम हो ।
‘विगत २०–२५ वर्षदेखि भारतको लुधियानामा व्यापार गरेर बसेको व्यक्ति कसरी कुन मापदण्डअन्तर्गत समानुपातिक सदस्यमा सिफारिस भयो ? यो आश्चर्य र शंकास्पद विषय हो,’ परिपत्रमा भनिएको छ । यसले जिल्लामा बसेर वर्षौदेखि पार्टी संगठन विस्तारमा लागेका कार्यकर्ताको आत्मबल गिरेको र उनीहरुको विद्रोहको भावना जाग्रित भएको कार्यवाहक सभापति कुमारको भनाइ छ ।
‘संगठनमा बसेर किन काम गर्ने भन्ने प्रश्न उठेको छ,’ उनले भनेका छन् । पार्टीप्रति चौतर्फी आक्रमण भइरहेको समयमा यस्ता कार्यले संगठनलाई थप क्षति पुर्याउने भएकाले बन्दसूचीमा पहुँच, पैसा र पावरको भरमा राखिएका नामावली यथाशीघ्र सच्याउन माग गरिएको छ ।
टिप्पणीहरू