सुदूरपश्चिममा मात्रै १२ को ज्यान गयो

कोरोना संक्रमणका कारण मृत्यु हुनेको संख्या लगातार बढिरहेका बेला पछिल्लो २४ घण्टामा सुदूरपश्चिम प्रदेशमा मात्रै १२ जनाले ज्यान गुमाएका छन् । गत २४ घण्टामा सुदूरपश्चिम प्रदेशका कैलाली,कञ्चनपुर,बझाङ्ग र दार्चुलातिर १२ जनाको मृत्यु भएको हो ।

सरकारी स्रोतले दिएको जानकारीअनुसार कञ्चनपुरको भीमदत्त नगरपालिकामा मात्रै पाँच जनाको ज्यान गएको छ । भीमदत्त नगरपालिका वडा नं. ७ का ६२ वर्षीय पुरुष,वडा नं. १९ का ३७ वर्षीय पुरुष,वडा नं. १८ का ६५ वर्षीय पुरुष,वडा नं. ६ का २४ वर्षीय युवती र वडा नं. १३ का ७४ वर्षीय बृद्धको कोरोनाका कारण मृत्यु भएको हो ।

त्यस्तै,पछिल्लो २४ घण्टामा कोरोनाबाट कैलालीमा चार जनाको मृत्यु भएको छ । लम्कीचुहा–१ का ३८ वर्षीय पुरुष, धनगढी–२ का ४३ वर्षीय पुरुष, लम्कीचुहा–१० का ३५ वर्षीय महिला र गोदावरी–१ का ३० वर्षीय पुरुषको कोरोनाका कारण मृत्यु भएको हो ।

बझाङको जयपृथ्वी नगरपालिका र तलकोट गाउँपालिकाका एक–एक जनालाई पनि कोरोनाले लगेको छ । जयपृथ्वीका ५५ वर्षीय महिला र तलकोट–१ का ४० वर्षीय महिलाको कोरोनाका कारण ज्यान गएको सरकारी स्रोतले जनाएको छ । दार्चुलाको व्यास गाउँपालिका पन्तोलीका ४५ वर्षीय एक पुरुषको पनि कोरोनाको कारण मृत्यु भएको छ ।