कोभिड खोप आयातमा चलखेल नगरेको हुकुमको दाबी ‘झूठो’

कोरोनाविरुद्धको कोभिसिल्ड खोप आयातमा कमिशनको चलखेल भएको समाचारलाई आधारहीन भएको बताउने हुकुम डिस्ट्रिब्युसन एण्ड लजिष्टिक प्राइभेट लिमिटेडको दाबी झुठो ठहरिएको छ ।

सरकारले २० लाख डोज आफैँ किन्ने निर्णय गरिसकेपछि थप ५० लाख डोज खरिदको निम्ति उसले स्वास्थ्य सेवा विभागमा पेश गरेको पत्रबाट उसको झूठ छर्लङ्ग हुन्छ ।हुकुमले ल्याउने ५० लाख डोज खोपको आधारमा प्रधानमन्त्री स्वयमले छोटो समयभित्रै सबै नेपालीलाई खोप लगाउने वचन दिनुभएको थियो ।

हुकुमले आज जारी गरेको विज्ञप्तिमा ५० लाख डोज खोप खरिदको लागि भएको पहलबारे केही पनि उल्लेख छैन ।

उसले सरकारले सोझै भारतको सिरम इन्स्टिच्युटसङ्ग खरिद गरेको १० लाख र प्रक्रियामा रहेको बाँकी १० लाख डोजसम्बन्धमा इन्स्टिच्युट प्रतिनिधिको हवालासहित स्पस्टिकरण दिएपनि १० प्रतिशत कमिशन उल्लेख गरेर गत फेब्रुअरी २४ तारिखका दिन विभागमा पेश गरेको प्रस्तावबारे उल्लेख नगर्नु रहस्यमय भएको छ ।

प्रस्तावमा ५ डलर ५० सेण्ट प्रति डोज खोपलाई ५५ सेण्ट कमिशन जोडेर ६ डलर ५ सेण्ट मूल्य कायम गरिएको छ । भुक्तानी भएको १ सय २० दिनभित्र खोप ल्याउने र उक्त प्रस्ताव ७ दिनको लागि मान्य हुनेगरी पेश गरिएको बकायदा उल्लेख छ ।

प्रस्तावमा रकम भुक्तानी ८० प्रतिशत पहिले र २० प्रतिशत खोप सिरमले पठाउने तयारी गरेपछि भनिएको छ ।

सिरमको आधिकारिक प्रतिनिधिको रुपमा हुकुमले विभागबाट फेब्रुअरी २४ को दिन गरिएको अनुरोधबमोजिम आफूले उक्त प्रस्ताव गरेको पत्रमा उल्लेख गरेको छ ।

यसबाट सरकारी अधिकारी,राजनीतिक नेतृत्व तथा सम्बन्धित पक्षको मिलेमतोमा ५० लाख डोज खोप खरिदमा पछिल्लो विनिमयदरअनुसार झण्डै ३६ करोड रुपैयाँको कमिशन रकममा चलखेल भएको स्वतः देखिन्छ । खोपको मूल्य ३ अर्ब ६३ करोड रुपैयाँभन्दा बढी पर्न आउने प्रस्ट छ ।