ठाकुरसहितका चार नेता निश्कासित,एक बर्षमै पार्टी बिभाजित

जनता समाजवादी पार्टी (जसपा) ले पार्टीका अध्यक्ष महन्थ ठाकुरसहित चार नेतालाई निश्कासन गरेसङ्गै एक बर्षअगाडि जुटेको पार्टी लगभग फुटेको छ । हिजो बसेको पार्टी कार्यकारिणी समितिको बैठकले ठाकुर,बरिष्ठ नेता राजेन्द्र महतो, लक्ष्मणलाल कर्ण र सर्वेन्द्रनाथ शुक्लालाई पार्टीबाट निश्कासन गरेको हो ।

वर्तमान सरकारमा जाने कि वैकल्पिक सरकार बनाउने भन्नेमा जसपामा लामो समयदेखि विवाद छ । विवादकै बीच ठाकुर खेमाले ओली सरकारमा सहभागी हुने तयारी गरेपछि चारै नेतामाथि अध्यक्ष उपेन्द्र यादवले स्पष्टिकरण सोध्नुभएको थियो ।

यसअघि जेठ ८ गते बसेको कार्यकारिणी समिति बैठकले सरकारमा सहभागी हुने नेता पार्टीबाट स्वतः निश्कासनमा पर्ने निर्णय गरेको थियो । उक्त निर्णयविपरित ठाकुर खेमा सरकारमा जाने तयारीका साथ बालुवाटारको भेटघाटमा व्यस्त रहेकै बेला जेठ १५ गते यादवले चारै जनालाई पुन: स्पष्टिकरण सोध्नुभएको थियो । तर, उनीहरुले स्पष्टिकरणको जवाफ नदिएकाले हिजोको बैठकले निश्कासनको निर्णय गरेको प्रतिनिधिसभा सांसदसमेत रहेका जसपा नेता रामसहायप्रसाद यादवले बताउनुभयो ।

पटक-पटक स्पष्टिकरण सोध्दा पनि चार नेताले जवाफ नदिएपछि कारवाही गरिएको यादवले बताउनुभयो ।

यसअघि ठाकुर खेमाले पनि अध्यक्ष यादवलाई २४ घण्टे स्पष्टिकरण सोधेको थियो ।

जसपाको केन्द्रीय कार्यकारिणी समितिमा यादव पक्षको बहुमत छ भने बिघटित प्रतिनिधि सभातर्फ सांसदहरुको संख्या ठाकुरसँग बढी देखिएको छ । पार्टी फुटाएरै भएपनि सरकारमा जाने तयारीमा रहेको महन्थ खेमासँग केन्द्रीय कार्यकारिणी समितिमा ४० प्रतिशत संख्या अहिले पनि छ । तर,प्रतिनिधिसभा विघटन भएको अवस्थामा राष्ट्रियसभामा रहेका तीन सांसदमध्ये दुई जना उपेन्द्रतिर लागेपछि संसदीय दलमा भने महन्थलाई ४० प्रतिशत पुर्याउन सकस देखिन्छ ।