कटुवा पेस्तोलसहित २ जना पक्राउ

धनुषामा कटुवा पेस्तोलसहित दुई युवक पक्राउ परेका छन् । विदेह नगरपालिका–६, तिनकोरिया चोक नजिक मैनाथपुर सडकबाट १ थान कटुवा पेस्तोलसहित दुई जना पक्राउ परेका हुन् ।

पक्राउ पर्नेहरुमा शहिदनगर नगरपालिका–३ का २५ वर्षीय उतिमलाल पासवान र सोही नगरपालिका–२ का १९ वर्षीय निपुल यादव रहेका छन् ।

मैनाथपुरबाट यदुकुहातर्फ जाँदै गरेको ज १० प ८६३५ नम्बरको मोटरसाइकललाई प्रहरी चौकी गिद्दा, धनुषाबाट खटिएको प्रहरीले चेक जाँच गर्ने क्रममा मोटरसाइकलमा सवार उतिमलालको साथबाट उक्त पेस्तोल फेला परेको थियो ।

लागूऔषध कारोबार गर्ने ८ जना पक्राउ

आज पनि लागूपदार्थ कारोबार र ओसारपसार गरेकोमा मकवानपुर, पूर्वी नवलपरासी, झापा र बाँकेमा ८ जना पक्राउ परेका छन् । हेटौंडा उपमहानगरपालिका–१ राप्ती होटलबाट ४ सय ५० मिलिग्राम ब्राउन सुगरसहित हिजो बेलुकी ४ जना पक्राउ परेका छन् ।

पक्राउ पर्नेहरूमा हेटौंडा उपमहानगरपालिका–११ का २४ वर्षीय ठाकुर गजुरेल, २० वर्षीय हिमाल बर्तौला, सोही उपमहानगरपालिका–१ चौकीटोलका २७ वर्षीय विशाल पौडेल र हुप्राचौरका ३० वर्षीय सोजन जोशी रहेका छन् ।

यस्तै, पूर्वी नवलपरासीको मध्यविन्दु नगरपालिका–१० मा नियन्त्रित लागूऔषध नाईट्रोभेट ३ सय ट्याब्लेट, स्पास्मो ३ सय ९३ क्याप्सुल, डाईजेपाम १० एम्पुल, फेनरागन १० एम्पुल, नुफिन १० एम्पुल र नगद ४८ हजार ८२ रुपैयाँसहित दुई जना पक्राउ परेका छन् ।

पक्राउ पर्नेहरुमा मध्यबिन्दु नगरपालिका–१० का ३४ वर्षीय राकेश पाण्डे २६ वर्षीय विशाल पाण्डे हुन् । बा४० प ३९९३ नम्बरको मोटरसाइकल चेक जाँच गर्ने क्रममा त्यसमा सवार उनीहरुलाई लागूऔषध सहित पक्राउ गरिएको हो ।

उता, झापाको बाह्रदशी गाउँपालिका–२, बुट्टाबारीचोकबाट करिब ३ ग्राम ब्राउनसुगरसहित स्थानीय २३ वर्षीय कुलबहादुर कँडेल हिजो अबेर पक्राउ परेका छन् ।

त्यसैगरी बाँकेको नरैनापुर गाउँपालिका–३ बालापुरबाट पनि करिब ५० ग्राम ब्राउनसुगरसहित राप्ती सोनारी गाउँपालिका–४ भवानीपुरका ४० वर्षीय वीरबहादुर केसी पक्राउ परेका छन् ।