बोलेरो दुर्घटनामा चालक गम्भीर घाइते
उदयपुरको उदयपुरगढी गाउँपालिका वडा नम्बर ३ चप्लेटीमा हिजो साँझपख बोलेरो पिकअप दुर्घटना हुँदा चालक गम्भीर घाइते भएका छन् ।
घाइते उदयपुर ताप्ली गाउँपालिका २ का २३ वर्षीय आकाश राई हुन् । जिल्ला प्रहरी कार्यालय उदयपुरका अनुसार चालक राईले बा १३ च ५६४८ नम्बरको बोलेरोमा खाद्यान्न ढुवानी गर्दा दुर्घटना भएको हो ।
उनी उदयपुरगढीबाट खाद्यान्न ढुवानी गर्दै लेखगाउँ जाँदै थिए । गाडी कच्ची सकडदेखि करिब १०० मीटर तल खसेर पूर्णरुपमा क्षतिग्रस्त भएको छ ।
घाइते चालकलाई उदयपुरगढी प्रहरी चौकीका प्रहरीले खबर पाउने वित्तिक्कै उध्दार गरी उपचारको लागि कटारी अस्पताल लगेका थिए ।
तर त्यहाँ उनको उपचार हुन नसकेपछि काठमाडौंं लगिएको जिल्ला प्रहरी प्रमुख भीमबहादुर दाहालले बताउनु भयो ।
टिप्पणीहरू