जग्गा बिक्रीमा किर्ते गरेर पछिल्लो खरिदकर्ताको ७० लाख झ्वाम

बिक्री भइसकेको जग्गा पुनः बिक्री गर्ने तर बिक्री वापतको रकम ठगेर बेपत्ता भएका एक जनालाई प्रहरीले समातेको छ । जग्गा किर्ते र ठगी गरेको आरोपमा धरान नगरपालिका ९ घर भई हाल काठमाडौंको ३२ वडामा बस्दै आएका रुसिल कटुवाल पक्राउ परेका हुन् ।

मोरङ केराबारी गाउँपालिका ६ घर भएका धिरजकुमार दाहाल र कटुवालले नुवाकोट तारकेश्वर २ का उद्धवप्रसाद अधिकारीलाई मोरङ केराबारीको जग्गा बिक्री गरेका थिए ।

अधिकारीले पनि बिक्री वापत ६८ लाख ९० हजार रुपैयाँ दिए । तर जग्गा पासै नगरी सम्पर्कविहीन भएपछि उनीहरुमध्ये कटुवाल प्रहरीको फन्दामा परेका छन् ।

उनीहरु पैसा बुझेर सम्पर्कविहीन भएपछि अधिकारीले मालपोत कार्यालय मोरङमा सोधखोज गर्दा उक्त जग्गा अन्य व्यक्तिहरुको नाममा बिक्री भइसकेको जानकारी पाएका हुन् ।

त्यसपछि उनले सबै व्यहोरा खोलेर हालेको जाहेरीको आधारमा महानगरीय अपराध महाशाखा मिनभवनबाट खटिएको प्रहरी टोलीले कटुवाललाई पक्राउ गरेको हो ।

पक्राउ परेका कटुवाललाई महानगरीय प्रहरी परिसर टेकु, काठमाडौं पठाइएको छ भने फरार धिरजको खोजी भइरहेको प्रहरीले जनाएको छ ।