काँग्रेसको अर्को चुनाव दिउँसो १२ बजे,नेता तथा कार्यकर्ता तितरबितर

नेपाली काँग्रेसको जारी १४ औं महाधिवेशनमा भएको निर्वाचनमा सभपतिका उम्मेदवारले ५० प्रतिशत मत कटाउन नसकेपछि दोस्रो चरणको चुनाव हुन लागेको छ । चुनाव अहिले १२ बजे शुरु हुने तयारी छ ।

अब प्रधानमन्त्री शेरबहादुर देउवा र शेखर कोइरालाबीच प्रतिस्पर्धा हुने छ । विजयी हुन जम्मा ८२ मत अपुग भएका देउवालाई अन्य उम्मेदवार विमलेन्द्र निधि वा प्रकाशमान सिंहको समर्थन आवश्यक देखिन्छ । कोइरालालाई पनि निधि र सिंह दुबैको समर्थनको जरुरत देखिएको छ ।

यता, प्रधानमन्त्री देउवाले दोस्रो चरणको निर्वाचन सुुनिश्चित गर्न सिंह र वरिष्ठ नेता रामचन्द्र पौडेल समूहसँग वार्ता र छलफल अघि बढाउनुभएको छ । अहिले पौडेल, देउवा र कोइराला सबै जनाबीच लैनचौरस्थित ब्याङ्क्वेटमा चियापान चलिरहेको छ । स्रोतका अनुसार पौडेल समूहले देउवालाई समर्थन गर्ने सम्भावना बढेको हो ।

अर्कोतर्फ प्रकाशमानले देउवालाई समर्थन गर्ने सम्भावना नदेखिएको बताइन्छ । तर ठूलै पदको अफर भएमा उक्त सम्भावना उल्टिने स्थिति समेत आज बिहान गृहमन्त्री बालकृष्ण खाँणसँगको भेटघाटपछि बनेको स्रोतको दाबी छ । सिंहलाई पार्टीभन्दा सत्तातिर आकर्षण गराइएको पार्टीभित्रका देउवा इतरहरुको भनाइ छ ।

विमलेन्द्र निधिले भने कुनै पनि हालतमा प्रधानमन्त्रीलाई समर्थन नगर्ने अवस्था कायम छ ।