हतियारमा लाटलुट पार्ने को हुन् मतियार ?

सिपाहीलाई मनलाग्दी बिदा बस्न लगाएर तोकिएको जिम्मेवारी पूरा नगरी तलबभत्ता खुवाउने सशस्त्र प्रहरीका थुप्रै एसपीमध्ये हातहतियार तथा यान्त्रिक कार्यशाला (आर्मोरर), बलम्बुका नानीराम हुमागाईं पनि हुन् । उनीमातहत ८० जना कार्यरत छन् । यसमध्ये एक चौथाईभन्दा कम कर्मचारीलाई मात्र कार्यालयमा राखी अरू सबैलाई बिदा छाड्ने गरेका छन् ।

महिनौंसम्म आउट रहे पनि तलब–भत्ता भने खाइरहने उनीहरूले फोकटमा बरालिएर राज्यबाट तलबभत्ता बुझेबापत हाकिमलाई रासनबापतको कति रकम छूट देलान् ? एक जना प्रहरी कर्मचारीलाई राज्यले मासिक ३ हजारभन्दा बढीको रासन उपलब्ध गराउँछ ।

८० जना कर्मचारीमध्ये २५ जनालाई नियमित काममा लगाई ५५ जनालाई बिदा छाडेर उनीहरूको रासनबापतको नगद हात पार्दा मासिक अतिरिक्त आम्दानी चोखै २ लाख हुन आउँछ । नेपालमा सरकारी जागिर खाएर हाकिमले डलरको भाउमा आम्दानी गर्ने र सीमारक्षाजस्तो संवेदनशील कार्यको जिम्मा भए पनि घरबारदेखि व्यापार व्यवसायसमेत गर्न पाइने भएपछि दुवै पक्ष तैं चुप मै चुप हुने नै भए ।नानीराममातहत शान्ति स्थापनार्थ द्वन्द्वग्रस्त मुलुकमा खटिँदा सशस्त्र प्रहरीले प्रयोग गर्ने ५४ वटा महँगा सवारी साधन पनि छन् । ती साधन दैनिक २ लिटर इन्धन राखी स्टार्ट गर्नुपर्छ । अरू ६ वटा ठूला सवारीसाधनलाई दिनहुँ ३ लिटर इन्धन राखी स्टार्ट गरेर तन्दुरुस्त राख्नुपर्ने हुन्छ । यस्तोमा पनि घोटाला हुने गरेको छ ।

गाडी स्टार्ट गर्न दैनिक प्राप्त हुने १२६ लिटर इन्धन सदुपयोग भएको होला कि दुरुपयोग ? तीन दिनमा एकपटक गाडी स्टार्ट गर्दा मासिक २० दिनको इन्धन बचत हुन्छ । दैनिक १२६ लिटरका दरले २० दिनको २५२० लिटर इन्धन फोकटमा हात पर्छ । अस्ति सोमबारको पेट्रोलको मूल्य प्रतिलिटर १४२ ले हिसाब गर्दा हिनामिना गरेबापत एक महिनामा ३ लाख ५७ हजारभन्दा बढी बच्छ ।

यी गाडीको मर्मतसम्भार शीर्षकमा वार्षिक ४२ लाख रुपैयाँ आउने गरेको छ । तर ०७४ सालदेखि खासै मर्मत गरिएको छैन । तैपनि, वार्षिक आउने रकम भने नक्कली बिल बनाएर खपत भैरहेको देखिन्छ । रासनमा कम गुणस्तरका सामग्री प्रयोग गर्ने, तोकिएको सूची अनुसारका नखुवाउने त कमाण्डर र मेसको जिम्मा लिएका सई देवेन्द्र श्रेष्ठको धन्दा नै हो । देवेन्द्र कोषराज वन्तसँगै अख्तियारको निलम्बनमा परी अनेक प्रपञ्च मिलाएर आएका पात्र हुन् । देवेन्द्रले वार्षिक १२ लाख बुझाई मेसको जिम्मा लिएको बताइन्छ ।

केहीअघि कर्मचारीको उपस्थिति र मेसको समेत जाँच गर्न आउँदैछौँ भनी एसएसपी दीपेन्द्र शाहले बिहान ६ बजे नै खबर गरी गएका थिए । त्यतिबेला एकएक जनासँग सोधपुछ गरियो ।

तर, उपस्थिति पु¥याउन पहिले नै खबर गरिएकाले बुटवल तालिममा गएका प्रहरीलाई समेत बोलाएर गन्ति पु¥याई बयानमा सामेल गरियो । सोधपुछ तथा निरीक्षणमा आउँदा दीपेन्द्रको समूहले गत साउनमा बढाइएको १५ प्रतिशत र कात्तिकदेखि बढेको थप १५ प्रतिशत रासन पाएको छ कि छैन, बिदा जाँदा पनि सशस्त्रले पाउने रासन पाएको छ कि छैन, बिदा जाँदा फाराम भरी रीतपूर्वक जाने गरेको छ कि फोनको भरमा ? लगायत प्रश्न सोधेका थिए ।

दीपेन्द्रको टोलीले नानीरामबारे परेका रासनमा हिनामिना गरेको, बिदामा जानेको रासन आफैं लिने गरेको, बेरितपूर्वक बिदा छाडी पछि हाजिर गराउने र शुभलाभ हासिल गर्ने गरेकोलगायत गुनासा र उजुरीका सम्बन्धमा पनि मंसिर २० गते लिखित प्रष्टिकरण सोधेको छ ।

– होमनाथ ज्ञवाली