अध्यक्षमण्डलका सदस्यमाथि कारबाहीको माग उठेपछि माओवादी बन्दसत्रमा विवाद

नेकपा (माओवादी केन्द्र) को जारी बन्दसत्रमा अध्यक्ष मण्डलका सदस्य गिरिराजमणि पोखरेलमाथि कारबाही गर्नुपर्ने माग उठेपछि विवाद भएको छ ।

प्रदेश २ का टोली नेता सत्यनारायण भगतले समूहगत निश्कर्ष सुनाउने क्रममा पोखरेल लगायतमाथि कारबाही हुनुपर्ने माग गरेपछि विवाद चर्किएको हो ।

आफूमाथि कारबाहीको माग उठेपछि असन्तुष्टि जनाउँदै पोखरेल बिहीबारको बन्दसत्रमै अनुपस्थित रहेको बताइएको छ । माओवादी स्थायी कमिटिका सदस्य पोखरेल र भगत दुबै प्रदेश २ का नेता हुन् ।

नारायणकाजी श्रेष्ठ नेतृत्वको तत्कालीन एकता केन्द्रबाट माओवादीमा आएका पोखरेलको समूह र जनयुद्ध लडेका पुराना नेताहरुबीच त्यहाँ लामो समयदेखि विवाद छ ।

पोखरेलमाथि धनुषामा रहेको जनयुद्धका सहिद रामवृक्ष यादवको शालिक हटाएर निर्मल लामाको शालिक राख्ने तयारी गरेको आरोप समेत लाग्दै आएको छ । पोखरेलले भने उक्त आरोप अस्वीकार गर्दै आएका छन् ।

सोही विषयलाई लिएर भगतले पोखरेललाई कारबाही गर्नुपर्ने माग गरेका हुन् ।